Lburania 11 - Samburu

Ltung'ana oaata nkurukoto

¹ Kore nkurukoto naa sipata niata ajo kedede nenia baa nisiliguta, niata sipata ajo keasai nenia baa nimidolita.

² Naa tankaraki apa naata lmakui lang nkurukoto payie eterrepa ꞉Nkai ninche.

³ Naa to nkurukoto nikiata kiteyieloutua nchere te rerei lenye eitibira ꞉Nkai nkop, metaa kore ntoki nalioo naa te nemelioo eitibiraki.

⁴ To nkurukoto eitaka ꞉Abel Nkai lasar supat olang le Kain. Naa tankaraki naata nkurukoto payie eikena ꞉Nkai ninye ajo loosipat, netachamayie lasar loo nkichoorot enyena. Naa kore abaki etua Abel, ewuon ake eirorita to nkurukoto.

⁵ To nkurukoto eiliepieki Enok aaya eitu eichamcham lkiye, neitu eitokini aadol amu keiliepie ꞉Nkai ninye aya chumata. Naaku kore eitu eiliepieki ninye, keterrepaki aajo keiting'ida Nkai.

⁶ Kore naa tenemetii nkurukoto, meidimai payie eiting'idi Nkai, amu kore pooki olotu netii ninye, naa meata ajo payie meiruk nchere keatae Nkai, naa ninye nalak lolo ooyiaya ninye.

⁷ To nkurukoto etecheta Noa meli aitejeu nkang enye. Keyanyita Nkai natilika ntoki nalotuta neitu aikata edoli. Kore te inia asata enye e nkurukoto neitodol nkop pooki ajo kedung'okini nkiguana, kake neaku ninye lobo lo loosipat oaata nkurukoto.

⁸ To nkurukoto eyanyita ꞉Abraam Nkai payie eipot metung'ai nkop enye alo nkae ng'oji naaku kenya nenye. Neinyuototo aing'uaa inia kop abaki meyielo neloito.

⁹ To nkurukoto eiwuoto alo amany nebik te inia kop naisiligieki ana lomoni, newuon taatua nkajijik nemebikieki ana neikuna tesiedi Isaka o Yakobo oichoo sii ꞉Nkai ilo lekutuk.

¹⁰ Amu keanyuta apa ninye ilo kerenket obik ntarasi laa kore ilo oitibira nechet naa Nkai.

¹¹ Naa to nkurukoto apa etumo abaki Sara nkidimata natang'asunyie ichoi o Abraam abaki etaarrarra ninye oleng, nera sii olipi, amu keiruko ilo oitaka Abraam lekutuk.

¹² Naaku kore te ilo payian obo, neiuni ichoi nawuana lakir le ai newuana sunyai lemeikenai le nchepata e mpaso, abaki etaarrarra oleng.

¹³ Kore kulo tung'ana pooki naa ketuata eiruko Nkai neitu eng'amaa mbaa naaisiligie ꞉Nkai ninche. Ketoduaa ake ewuon elakua, neng'ida neiken aajo kera ninche lomon o lapuayak to nkop.

¹⁴ Kore lolo oojo kuna baa naa keitodolu nchere keyieita nkop nara nenche.

¹⁵ Tanaa keparraa apa inia kop natung'aitie, anata apa etumo mpaach nachukore.

¹⁶ Kake keng'uarrita apa ninche nkang e chumata nara nkop supat alang inia. Naaku menya ꞉Nkai anyit teneipoti aajo Nkai enche amu keitibiraka ninche nkang te chumata.

¹⁷ To nkurukoto apa etejo Abraam ntai ꞉Isaka metaa lasar payie esaan ꞉Nkai ajoki meitai. Ilo Abraam oatang'amayie lekutuk le Nkai, oitayia layieni lenye obo ake metaa lasar,

¹⁸ abaki etiaka ꞉Nkai ninye, nchere <>

¹⁹ Keikena ninye ajo keidim Nkai aitipiu lootuata, naa ketuwuana ketuchukokaki Abraam layieni lenye eing'uaa lkiye.

²⁰ To nkurukoto etamayianaka ꞉Isaka Yakobo o Esao mbaa naawuon kenya epuonu.

²¹ To nkurukoto etamayiana ꞉Yakobo layiok le Yosep, eirrigo atukuny sobua enye asai Nkai etaa keye.

²² To nkurukoto eimaka Yosep naidurra ee ltung'ana loo Isirael to nkop e Misiri neitoki aitaarriyianaki ninche neiko loik lenyena. Ketejo ana, etaa kedung'o tau.

²³ To nkurukoto eisudoitie ntoiwuo e Musa Musa payie eini amu ketoduaa aajo kera nkerai ee mbene neitu euriei ninche nkitanapata e lkinkii.

²⁴ To nkurukoto etanya Musa eji layieni le ntito e Parao payie ebulu.

²⁵ Ketegelua ninye meitami sina tenebo o ltung'ana le Nkai alang teneng'idakino ng'ok te nkiti kata.

²⁶ Nechamaa meitami anyit ana naitamaki apa Kristo, alang teneng'idakino parakuoicho e Misiri, neipirie nkonyek enyena inia laata kenya natum.

²⁷ To nkurukoto etung'ayie ninye Misiri meurie lkinkii le inia kop, neng'iri ana ltung'ani otoduaa ilo lemelioo.

²⁸ To nkurukoto etama Musa ntasim e Pasaka neelie lodo nkutukie ee nkajijik metaa mear ilo malaika oitanapaki metara lkikaun, lkikaun lenche.

²⁹ To nkurukoto etalang'a ltung'ana loo Isirael mpaso naji Mpaso Nanyiekie aaim atuwuana ake nkop natoyio eimita, kake kore payie ejo ltung'ana loo Lmisiri entalang, neya ninche ꞉mpaso.

³⁰ To nkurukoto apa etuurori sunta e lkerenket le Yeriko, payie eman ltung'ana loo Isirael aaigilu mperot sapa ana natiaka ꞉Nkai.

³¹ To nkurukoto apa eima milayoi naji Raab aras e kumojik eitu eri tenebo ꞉lolo oaatanya ening Nkai amu keitoomono neisudoo ltung'ana oochomo aaikitalan inia kop.

³² Kaa ae newuon aliki ntae? Maata nkata naimakinyie Gideon o Barak o Samson o Yepat, Daudi o Samuel o loibonok le Nkai.

³³ Kore to nkurukoto ketimira ninche lochon, netaasa naasipa, neng'amu lekutukie le Nkai, neikeno nkutukie ee lng'atunyo,

³⁴ near nkima naiyupuyup, netapaachere lkiye la lalem. Neibelekenyi nchalan enche metaa ngolon, neisul ta larrabal nemir njorin ee lmang'aterei.

³⁵ Kore ntomonok naatuata nkera enche, nechukokini eitipiwuaki. Kore lkulikae, neitamaki sina neany elakuni amu keikena aajo ketum kenya nkichon ee ntarasi te inia piunoto supat e siedi.

³⁶ Ketediaaki neidong'i lkulikae, tapala abaki ajo inia, keteenaki abaki nepiki jila.

³⁷ Netanang'aki lkulie aar metuata too soito, nesachi lbata lenche katare, neri lkulie metuata taa lalema, nebik lkulie eichopito ndapan ee nkineji o nee nkerra, neng'oriki mbaa e nkichon, neitami sina, neri metuata.

³⁸ Neaku nkop ng'oji nemeichiaakino ninche, nemanmanaa tee lkeesi o ldonyuo, ejing'aa nkapunia o udot e nkop.

³⁹ Kore kulo tung'ana pooki naa keterrepaki tankaraki nkurukoto enche, kake eitu etum inia natejo apa Nkai keicho.

⁴⁰ Amu ketegelaka apa iyioo pooki Nkai mbae supat naaku meyieu ninye payie ebaya ninche mikitii iyioo.