Lburania 10 - Samburu

¹ Kore nkitanapat e Musa, naa keata loip loo nana baa supati naapuonu, mara nenia baa supati eata kake loip ake. Kore abaki eitaitae lolo asarri ooitanapaki tee nkitanapat lari o lari, naa meidim aikata aaitaa lolo oopuonu tekue Nkai loosipat.

² Tanaa apa keidim, anata etapalaki meitaini amu kore inia kata nabo ake naa keidip aitisinya lolo oopuonu tekue Nkai metaa meitoki aadol aajo ketaasa ng'oki.

³ Kake kore lolo asarri naa keitaparru ninche ng'ok enche lari o lari,

⁴ amu meidim lodo laa laing'ok o laa ntare aaitai ng'ok.

⁵ Kore naa payie elotu Kristo ana kop nejo, <

⁶ Neitu ichamaa iyie lasar opejori o lasar loo ng'ok.

⁷ Najo, >>

⁸ Ketang'asa ajo, <> abaki eyiere payie eitaini ana najo nkitanapat.

⁹ Neitoki ajo, <> Kore peejo nejia, neiwuang'ie inia oitiei apa musana nasayieki ninye neyau ng'ejuk.

¹⁰ Naa kore te inia yieunoto enye, neitisinyaki iyioo te sesen le Yeso Kristo oataa lasar lang nkata nabo ake.

¹¹ Kore ake laitainoni pooki la lasar naa meatae mparri nemeitache aas siaai lenye, eigil aitai lolo asarri le oochiaake lemeidim hoo katukul aawaita ng'ok.

¹² Kake nkata nabo ake eitayia Kristo koon aaku lasar loo ng'ok obik ntarasi, newuon ta nkaina e tetene e Nkai.

¹³ Kore ang'asu inia kata naa keanyuta meidacha lmang'ati lenyena murto.

¹⁴ Amu kore tankaraki nataa ninye lasar nkata nabo, neitaa lolo ooitaaki sinyat, ltung'ana lemeata ntioto ntarasi.

¹⁵ Naa ketilika sii iyioo Ltau Sinyati sipata naipirita ana. Kore eidipa atejo,

¹⁶ <>

¹⁷ neitoki ajo, <>

¹⁸ Kore naa etapalikaki ng'ok, naaku meitokini aaigil aaitai lasarri loo ng'ok.

Yeso nkoitiei najing'ieki Ng'oji sinyati naaisul pooki

¹⁹ Naaku lalachera o nkanachera, ikindim aatijing inie Ng'oji sinyati naaisul pooki mikiata ngureticho tankaraki naibukoyie Yeso lodo lenye.

²⁰ Kore lkiye le Yeso naa ninye nkoitiei ng'ejuk naichu nikijing'ie, aapachaki inie Ng'oji sinyati naaisul pooki,

²¹ nikiata laitainoni kitok la lasar supat oitacheki ltung'ana le Nkai.

²² Naaku matinyikaki naa Nkai ta ltau odede kiata sipata ee mbaa nikiruko, neitukoyieki mbaa pooki torrok nikimusoo aajo kintarruoitie to lodo le Kristo neitukoki seseni lang ta nkare jirlil.

²³ Mikipal kilimu aaipidaki ilo siligi likijo ikiata, amu keisiligai ilo oichoo iyioo lekutuk.

²⁴ Maing'urai sii nikinko payie kerretena likae o likae aaitoduaaya nchaman nikias supati.

²⁵ Nimikipal mikitumo tenebo ana neasita lkulie, kake entogoloto, naleng idolitata aajo ketinyikua Mparri e Laitoriani.

²⁶ Amu tinikiche aabaraki aas ng'ok kindipa aateyiolo sipata nadede, naaku merekure eatae likae asar ooitukoo ng'ok ang.

²⁷ Kore natiu naa nkiguana o nkima napi namut lolo mang'ati le Nkai kianyuta te ngureticho.

²⁸ Kore apa teneany ltung'ani eirukurukore nkitanapat e Musa, naa keri metua meatae lng'ur teneatae ltung'ana oare tanaa okuni oaata sipata e inia.

²⁹ Entaparrai naa ja newua wochoto naichiaakino ltung'ani lemeyanyit Nkerai e Nkai, newa ilo odo lo lning'o oitisinya ninye metaa ntoki namara sinyati, netediaa Ltau Sinyati oicho iyioo munyani e Nkai.

³⁰ Amu ikiyielo ninye otejo, <> naa kore aitoki, <>

³¹ Naaku ntoki naituriaicho oleng tinirrachu koon itii nkaik e Nkai naichu naiguanicho.

³² Entaparru apa payie ing'amumu wong'an e Nkai, ninkuna payie ing'iriri sina ogol.

³³ Ketediaaki neitami ntae sina tekue ltung'ana, nintokiki sii aikata aaku tenebo o lkulie ooitaasitae nejia.

³⁴ Ing'urrie ntae lolo ooteenaki te jila, nitachamaitie te ng'ida meewae ntokitin inchi amu iyielolo aajo iatata ntokitin e tipat naabik ntarasi nianyutata naalang nenia naawaki.

³⁵ Naaku eminturraa nkiteunoto inchi, amu keyau laata kitok.

³⁶ Keyiere ning'iriri payie itumtum aataas yieunoto e Nkai, nitumtum inia naitayia Nkai lekutuk ajo keicho ntae.

³⁷ Amu kejo lkigerot sinyat, <

³⁸ Kore ltung'ani lai loosipat naa nkurukoto eichiwue. Naa kore teneiwuatuwuata arrinyo siedi, namang'idakino nanu ninye.>>

³⁹ Kake mikira iyioo lolo ooiwuatuwuata aarrinyo siedi, kake ikiata nkurukoto naa ikitum nkichui ee ntarasi neiteng'elakaki iyioo.