Epeso 4 - Samburu

Sesen obo oata rubat kumo

¹ Naaku, kore nanu oena tankaraki naisiaaita Laitoriani, kaitaarriyian ntae entewueni te nkichon nairirikino nkupototo naipotoki ntae entaa ltung'ana le Nkai.

² Entaa katukul ltung'ana ooitodou ate, niborbor, ning'iriri, meatae lemeng'iri o likae taatua nchaman,

³ ninyoknyok aaibung naboicho e Ltau Sinyati to sotua oen ntae entaa nabo.

⁴ Keatae sesen obo o Ltau Sinyati obo, ana nara siligi oipotoka ntae Nkai obo.

⁵ Lobo Laitoriani, nabo nkurukoto, nabo nkipatisare,

⁶ naa nabo sii Nkai, laa ninye Papa lang iyioo pooki, naa ninye oitore pooki neasicho aimu pooki o taatua pooki.

⁷ Kake meatae lobo lang leitu eichori munyani e Nkai te nkiririkinoto ana naoriki Kristo pecheu.

⁸ Naa inia payie eigero too Lkigerot sinyat nchere, <>

⁹ Amaa inia najo <>, nyo eipirita mara ake ketodoyie tekue alo lodo le nkop?

¹⁰ Kore ilo laa ninye otodoyie alo lodo le nkop, naa ninye ake aitoki oiliepa arepaa keper e keper pooki, payie etum ninye ataa meata nemetii.

¹¹ Naa ninye oitaa lbata lkipaareta, neitaa lkulie loibonok, neitaa lkulie lalikorok loo Lomon Supati, neitaa lkulie lchekuti le nkanisa, neitaa lkulie laiteng'enak,

¹² payie erreteni sinyat meisiayia Nkai, neitubulu sesen le Kristo,

¹³ ana matum pooki naboicho e nkurukoto o ne yielounoto e Nkerai e Nkai, nikibulu tenebo aabotoru ana matitiu katukul ana netiu Kristo.

¹⁴ Naaku mikintoki aaku nkera naanang'aa laing'ok le nkare idie o idie, nenia naaya siwuo pooki le nkiteng'ena ee ltung'ana oaasapicho o loaata losegin, neitopong'oo metijing'a atua losegin le sapare.

¹⁵ Kake kore nayiere tee iyioo naa payie kimbung ndedei te nchaman, nikibulu aanyunyukorei Kristo taa mbaa pooki, ilo laa ninye nkue e nkanisa.

¹⁶ Laa te ninye ebulu sesen pooki te nchaman, nerubi neibung'a tenebo netum rubat pooki inia nayieu aimu mpit naaibung'uta. Nemeata rubata nemeas siaai enye ana naichooki metaasa.

Nkichon ng'ejuk taatua Kristo

¹⁷ Naaku kajoki ntae ana, naitarrap ntae ta nkarna e Laitoriani, nchere payie mintokiki katukul aawueni ana neiko loreren lemeyielo Nkai ooirukurukore mparrunot enche e pecheu.

¹⁸ Kore mparrunot enche naa naimin, nelakuaniki inia kichui naicharu Nkai, tankaraki nemeitoki eyielo negol kuechi.

¹⁹ Ketuata ninche seseni, netapalikita ate mbaa pooki e anyit, paa kore te lubo enche nedoki mbaa pooki torrok.

²⁰ Kake kore ntae meyiere niwuenini aaiko nejia amu iteyieloutua netiu Kristo.

²¹ Itining'o apa lomon lenyena neiteng'enaki ntae mbaa naipirita ninye ana netiu ndedei taatua Yeso.

²² Keiteng'en ntae inia entuburkuchu lwuenet linchi le apa, ilo oyieu mpukunoto inchi torno naitarrorrita yieunot torrok o sapare, nirukurukorere.

²³ Neiteng'en ntae embelekenya ninkoko tinidoldol mbaa,

²⁴ neitoki sii aiteng'en ntae enchopo mpukunoto ng'ejuk naitibiraki metinyunyukore Nkai te sipata o te sinyaticho naing'uaa ndedei.

²⁵ Naaku entapal sapare, nemeata lemeirorie likae te ndedei, amu ikira pooki rubat e sesen obo, nemeata nemeyieu reto e nkae.

²⁶ Entogoroto kake emias ng'ok. Emincho edooyo ndama ewuon itogorete,

²⁷ niminchocho Chitani mpaach.

²⁸ Nchoo metaa meitoki ilo opurruchio apurrucho, kake nchoo eisiaaicho taa nkaik enyena, aas siaai supat payie etum atang'arie ilo otong'orika.

²⁹ Emiimunyie rereii lemeichiaakino nkutukie inchi, kake eroro nenia baa supati naareticho, neichiaakino te inia kata, payie eret lolo ooning.

³⁰ Emisinanie Ltau Sinyati le Nkai, laa ninye sipsip e lakunoto inchi kenya te inia parri.

³¹ Enturrai mion nayau ngoro o lchut le ngoro o lbuaa o ldeket pooki tenebo sii nkiba pooki.

³² Kake entaasa ltung'ana supati niakuku loaanana ochuaa, nipalikiki lkulie ana natapalika ntae Nkai taatua Kristo.