Epeso 3 - Samburu

Siaai le Paulo too ltung'ana lamara loo Lyiaudi

¹ Tankaraki inia paa kore nanu Paulo, oena tankaraki nara le Kristo Yeso o tankaraki natilika ntae, ltung'ana lamara loo Lyiaudi Lomon Supati, naomon Papa.

² Kasip ajo itining'o kipirte e Nkai naaichoo nanu te munyani enye matiliki ntae,

³ inia kipirte e Nkai naisudoro naaibalakinyieki nanu ana naidipa aigero to ndorropo.

⁴ Tinisomsom ana, indimdim aateyielo ning'unoto naata tana bae naisudoro naipirita Kristo,

⁵ inia neitu apake eiteyielo ꞉Nkai ltung'ana loo ntowuoitin e apa ana natoboloka taata ta Ltau lenye Sinyati, Lkipaareta o loibonok lenyena sinyat.

⁶ Kore inia neitu apake eyielouni naa ana, nchere kore aimu Lomon Supati, neng'amaa ltung'ana loo lkulie oreren, tenebo o Lyiaudi mayianat e Nkai naatum ltung'ana lenyena. Kera ninche o Lyiaudi rubat e sesen obo neikenakino sii lekutuk le Nkai etii atua Kristo Yeso.

⁷ Naaichoo nanu ꞉Nkai to munyani enye mataa laisiaayiani loo kulo Omon Supati to ngolon enye naasicho.

⁸ Kore abaki aa nanu lkini alang lkulie sinyat pooki, nanu eichoo Nkai ana munyani enye, matiliki ltung'ana loo lkulie oreren lamara loo Lyiaudi nowua mayianat naatii atua Kristo nemeata nkiting'oto,

⁹ nabol ltung'ana pooki nkonyek, meteyielo neikununo kipirte naisudoro e Nkai, inia kipirte naa ꞉ilo oitayia ntokitin pooki ake apeny apa oyielo.

¹⁰ Neyielou taa taata ꞉lolo oaata nkitoria o nkitoo te chumata, ng'eno nagut e Nkai ee mpukunot kumo aimu nkanisa.

¹¹ Keata apake Nkai inia bae ewuon eitu eitai nkop, neitabayie taatua Kristo Yeso Laitoriani lang,

¹² ilo laa taatua ninye ikiata nkitieunoto nikindim aaotunyie netii Nkai to nkurukoto, mikiata ngureticho.

¹³ Naaku kajoki ntae payie minchocho egila ntae ltauja tankaraki e sina laatumo tankaraki natilika ntae Lomon Supati, amu ketaase inia payie itumtum ntae rrepeta.

Etoomonoka ꞉Paulo nkanisa nati lkerenket le Epeso

¹⁴ Tankaraki inia paagilaki Papa kung aomon,

¹⁵ ilo laa kore pooki oipoti aajo papa te chumata o to nkop, naa ninye eipotieki.

^16-17 Kaomon meitogolo ꞉ninye nkurruki inchi oleng, te risioroto e nkitoo enye kitok, aimu Ltau lenye Sinyati, payie emany Kristo atua ltauja linchi to nkurukoto, paa kore itaa ltung'ana ootuunote lemeigusgus taatua nchaman,

¹⁸ nindimdim katukul aatining'u, tenebo o sinyat pooki, neba lalau o lakuani o nkadoro o nguton e nchaman e Kristo.

¹⁹ Kaomon Nkai payie ipuonunu aayielou inia chaman e Kristo narepaa yielounoto pooki, payie ebaya katukul inia kipirte e Nkai taatua ntae.

²⁰ Kore ilo oidim ataasa to ngolon enye naasicho taatua iyioo mbaa kutuaa naalang nikindim iyioo aatoomonu tanaa aataparrai,

²¹ metaa nenye nkisisa tee iyioo otii nkanisa nikitii atua Kristo Yeso, too ntowuoitin pooki ntarasi o ntarasi! Aamin.