Epeso 2 - Samburu

Eichooki ntae nkichui ng'ejuk taatua Kristo

¹ Keichoo apa ntae Nkai nkichon ng'ejuk ewuon irara ntae ltung'ana ootuata iasitata ntorrok o ng'ok inchi.

² Ipuoyieyie apa nenia oitiei naapuoyie ltung'ana lemeyielo Nkai. Nirukurukorere ilo oirirua oitore nkitoria e loing'ang'e, oasicho taata taatua lolo lemening Nkai.

³ Naa nejia sii apake kitiu iyioo pooki kirukurukore nenia ng'uarrat torrok e mpukunoto ang torno, nikintabaya ng'uarrat e sesen o nee mparrunot. Naa kore iyioo ikira ltung'ana ana ake lkulie pooki, ooichiaakino nemut ngoro e Nkai.

⁴ Kake keisapuk lng'ur le Nkai, necham iyioo oleng,

⁵ naa inia paa kore abaki ewuon kituata tankaraki ng'ok ang, neicho iyioo nkichui ng'ejuk tenebo o Kristo. Naa munyani e Nkai eitejeunyieki ntae.

⁶ Neitipiu iyioo ꞉Nkai too lootuata tenebo o Kristo Yeso, neitowuon iyioo o ninye te chumata, ikitii atua ninye.

⁷ Paa kore taa ng'amat naapuonu, neitodolu ninye neba leng'on e munyani enye, eitaasita iyioo supati taatua Kristo Yeso. Nemeata inia munyani enye lnyanyukie.

⁸ Amu eitejewua ntae Nkai te munyani enye to nkoitiei e nkurukoto, namara ntae eing'uaa inia kake nkichooroto naichoo ninye ntae pecheu,

⁹ namara tankaraki ntoki eatae nitaasa, payie meata ltung'ani orrep koon.

¹⁰ Amu ninye oitaa iyioo nikitiu taata, aitibir iyioo taa nkaik enyena kitii atua Kristo Yeso payie kias asat supati, nana apake naaitibiraka iyioo mataas.

Naboicho taatua Kristo

¹¹ Naaku taa, entaparru netiu apa mbaa! Kore Lyiaudi oomurata muratare namurati ake sesen naasi taa nkaik ee ltung'ana, keipot ate aajo loomurata neipot ntae aajo lmomurata.

¹² Naa kore apa ntae te inia kata, miatata Kristo, nirara ltung'ana leiching'a lemeata nejo locho le Isirael, niminkenakinono lning'on le lekutuk le Nkai, nimiatata siligi nimiatata Nkai to nkop.

¹³ Kake kore taata itii atua Kristo Yeso, kore ntae apa oaalakua nitinyikutua taata aaimu lodo le Kristo.

¹⁴ Amu ninye oichoo iyioo Lyiaudi matum sotua o lkulie oreren, naa ninye oitaa Lyiaudi o lkulie oreren nabo, neuroo suntai e lamang'ate apa naor iyioo,

¹⁵ aiting'ie Nkitanapat o lkerreti te sesen lenye to lmusalaba. Ketaasa ana payie etum aitai to lorere loo Lyiaudi o lkulie oreren lorere obo ng'ejuk to koon, neyau te inia oitiei sotua.

¹⁶ Neitutumoki lorere loo Lyiaudi o lkulie oreren Nkai te sesen ake obo to lmusalaba, neichu katukul mang'antiticho te inie.

¹⁷ Neyewuo Yeso aliki pooki lomon le sotua, ꞉lolo oaalakuaniki apa Nkai o lolo oaataaniki.

¹⁸ Amu kore tankaraki inia nataasa Kristo, nikitum pooki aatu netii Papa aaimu ilo Tau Sinyati ake obo.

¹⁹ Naaku taa kore tankaraki inia, merokure irara lomon nimirara ltung'ana leiching'a, kake irara loopeny nkop tenebo o sinyat nirara ltung'ana le Nkai.

²⁰ Irara ntae nkaji naa Lkipaareta o loibonok le Nkai nkitamanyunoto enye, nera Kristo Yeso koon soit le tipat oirichiu nkaji,

²¹ laa te ninye eibung'a nkaji pooki tenebo, nebulu aaku nkaji sinyati e Laitoriani.

²² Naa taatua ninye sii echetutae ntae aaibung'ie tenebo ta Ltau Sinyati payie iakuku ng'oji nemany Nkai.