Epeso 1 - Samburu

¹ Nanu Paulo, oataa Lkipaaret le Yeso Kristo ana nayieu Nkai paaku, oiroroki sinyat otii Epeso, ooisiligai taatua ilo Aitejeunoni oaanyutae apa oji Yeso.

² Metaa munyani o sotua oing'uaa Nkai Papa o Laitoriani Yeso Kristo tenebo o ntae.

Mayianat nikitum kitii atua Kristo

³ Meisisi Nkai nara menye Laitoriani lang Yeso Kristo, ilo oatamayiana iyioo taatua Kristo tee mayianat pooki e Ltau Sinyati naaing'uaa chumata.

⁴ Ketegelua ꞉ninye iyioo ewuon eitu eng'asu aitai nkop tankaraki e inia nataasa Kristo, payie kitum aataa sinyat nimikiata sii ntioto tekue ninye.

⁵ Kore te nchaman enye, negelu apake iyioo, neitaa nkera enyena aimu Yeso Kristo. Keiririkino apa inia yieuna enye supat,

⁶ payie kitum aaterrep ninye tankaraki munyani enye kitok naichoo iyioo pecheu aimu Nkerai enye nacham.

⁷ Ilo laa te ninye ikiata lakunoto natalaa to lodo lenye, aa taa ketapalikaki iyioo nkitarruorruot ang. Keitodolu ana newua munyani naichoo iyioo Nkai,

⁸ tenebo o ng'eno nagut o yielounoto ee mbaa pooki naaichoo iyioo aiputaki!

⁹ Eibalakinyie iyioo yieuna enye naisudoro ana natudung'o ninye apa te Kristo.

¹⁰ Kore payie ebau nkata naitabaya inia kipirte naata payie eitejeu Ltung'ana, neyau ntoki pooki metaa tenebo taabori nkitoria e Kristo, pee era naatii chumata tanaa naatii nkop.

¹¹ Kore taatua Kristo ikitum iyioo inia natejo apa ꞉Nkai ikitum te risiorote e kipirte enye, inia nategelakaki iyioo apake ewuon mikitii. Ninye oaas mbaa pooki ana nayieu o ana nadung ninye,

¹² paa kore iyioo ootipika siligi lang atua ilo Aitejeunoni oanyutae, abaki apake ewuon eitu elotu, nikirrep ninye tankaraki nkitoo enye.

¹³ Taatua ninye sii aitoki itaa le Nkai apa payie ining'ining nirukuruk rerei le ndedei, lolo Omon Supati le njeunoto inchi. Naa taatua ninye sii itumo Ltau Sinyati le lekutuk oitaka iyioo Nkai, laa ninye sipsip nchere irara le Nkai.

¹⁴ Ltau Sinyati oitededeyie nchere iking'amaa inia naisiligie ꞉Nkai ltung'ana lenyena tenelakuni kenya. Nikirrep ninye tankaraki nkitoo enye.

Nache o nkomono

¹⁵ Katining'o nkurukoto niatata ta Laitoriani Yeso o nchaman niatata too sinyat le Nkai pooki, naa tankaraki inia payie

¹⁶ eitu apal eitu aichooyo nache tankaraki ntae, aparru ntae to nkomono ai.

¹⁷ Kaamon Nkai e Laitoriani lang Yeso Kristo oara Papa openy nkitoo, meichoo ntae yielounoto o ng'eno nagut naing'uaa Ltau Sinyati, neboloki ntae mbaa ipuopuo kue aayielou ninye.

¹⁸ Naamon sii metobolo Nkai ltauja linchi, payie itumtum aateyiolo nowua siligi oipotoka ninye ntae, o nowua supaticho e inia natipika Nkai metaa ninchi tenebo o sinyat lenyena,

¹⁹ o nowua ngolon enye nemeata lnyanyukie naasicho too iyioo ooiruko. Kore inia golon naa ngolon e nkidimata enye kitok,

²⁰ nataasichiere ninye te Kristo inia kata apa payie eitipiu ninye too lootuata, neicho metowuana ta nkaina enye e tetene te chumata,

²¹ meisula katukul nkitoria o nkitoo o ngolon o lolo ooitoricho pooki o pooki toki naipoti, namara ake tana ng'amata, kake abaki ta ng'amata nalotu.

²² Netipika ꞉Nkai pooki taabori nkitoria enye, neitaaki ninye metaa nkue e nkanisa neitore pooki natii.

²³ Nkanisa nara sesen lenye, inia naaiput ꞉ninye neiput sii pooki toki taatua pooki.