Asat 18 - SamburuPaulo te lkerenket le Korinto 1 Kore tesiedi inia, neinyuototo Paulo ta Aten nelo Korinto. 2 Netum teinie Lyiaudii oji Akuila le nkop naji Pontos, lowuon era omoni eing'uaa nkop e Itali, o ntomononi enye naji Pirisila. Amu kore apa Kilaudio oara Kaisari inia kata, naa ketejo meata ajo mepuo Lyiaudi pooki aaing'uaa Rrom. Nelo Paulo adol ninche, 3 newuon aasicho tenebo, amu kore apa siaai lenche naa imaii eitibir ana ninye. 4 Kore chiaake mparri pooki e Sabato, neiguana ninye o Lyiaudi o Lgirriki te Sinagogi enyok aiteyielo sipata naipirita ilo Aitejeunoni oji Kristo. 5 Kore payie edou Silas o Timoti te Makedonia, neirrachu Paulo eitayia koon aliki Lyiaudi sipat nchere kore Yeso naa ilo Aitejeunoni oanyutae oji Kristo. 6 Kake kore payie eany ꞉Lyiaudi nedek ninye, neipiripiroki ꞉Paulo ninche nankan, enang'aki nkaik ejoki, < 7 Neinyuototo Paulo aing'uaa ninche nelo nkaji e ltung'ani oji Tito Yusuto oourie Nkai, oibung'are nkaji enye sinagogi. 8 Kore lkitok le inia sinagogi oji Kirisipo o nkaji enye pooki neiruk Laitoriani. Neiruk sii ꞉ltung'ana kumo le ilo kerenket ooinining'ito Paulo neipatisi. 9 Kore nkuarie nabo, neipung'oki ꞉Laitoriani Paulo neirorie ajoki, < 10 Amu kati nanu tenebo o iyie, nemeatae hoo ltung'ani likindim aiseyie nikiar, amu kaata ꞉nanu ltung'ana lainien kumo lairuk te ele kerenket.>> 11 Newuon Paulo teinie lari obo o lapatin ile, eiteng'enicho rerei le Nkai. 12 Kore era Galio larikoni kitok loo Rroman oitore nkop e Akayia, neinyuototo Lyiaudi tanaboicho aarare Paulo, neyau tekue nkiguana 13 nejo, < 14 Naa kore najoyie Paulo tobolo nkutuk airo nejoki ꞉Galio Lyiaudi, < 15 Kake tanaa rerei o nkarn o nkitanapat inchi kinchankarare, naa eng'urai ntae maate, amu mayieu naaku ladung'oni le nenia baa inchi.>> 16 Nemiraa ninche meipung'o teinie. 17 Neibung taa ꞉ninche Sositenes lkitok le sinagogi neidong tekue inia kiguana. Kake kore Galio, naa eitu eya inia aitaa toki. 18 Neitoki Paulo abik mperot kumo te Korinto tenebo o lkulie ooiruko Yeso. Kore payie eicho ninche lesere, nelo lkerenket oataaniki inie le Kenkerea nedung lpapit aitabaya mbae natudung'o apa ajo keas. Nedir meli alo nkop e Siria, nerubare Pirisila o Akuila. 19 Kore payie ebaya ninche Epeso neing'uaa Prisila o Akuila, nelo ninye ajing sinagogi neirorie Lyiaudi. 20 Neomon metibiko nkuti perot teinie, kake neany. 21 Neicho ninche lesere nejoki, < 22 Kore payie ebaya Kaisaria, neiliep alo Yerusalem airoroki nkanisa, neitoki adoyio alo Antiok. 23 Kore payie eikonyi abik teinie, neitoki alo amanaa taatua lubot pooki e Galatia o ne Paragia eitogol looiteng'eni pooki. 24 Nelotu inia kata Epeso ltung'ani obo loo Lyiaudi oji Apolos ootiwuaki te lkerenket le Alekisandiria. Kore apa ninye naa kera arriyia neyielo oleng Lkigerot Sinyat. 25 Naa keiteng'enaki apa taatua nkoitiei e Laitoriani, neiteng'enicho te nyuata mbaa naaipirita Yeso aaiririki, abaki aa nkipatisare e Yoana apeny eyielo. 26 Neng'asu aiteng'enicho meata lng'ach te Sinagogi. Kore payie ening ꞉Pirisila o Akuila ninye eiteng'enicho, neipot aya bata, neliki aaipidaa to nkoitiei e Nkai. 27 Kore payie ening lolo ooiruko Kristo aajo keyieu Apolos nelo Akayia, neretoo inia duaata enye, neigeroki looiteng'eni ootii inie mpalai payie eng'amaa ninye. Kore payie ebaya inie, nenyok aretu te munyani e Nkai lolo ooiruko Yeso. 28 Amu ketimira ninye Lyiaudi eirorie to ngolon tekue ltung'ana, easichere Lkigerot Sinyat aibalakinyie ajo, kore Yeso naa ilo Aitejeunoni oaanyutae oji Kristo. |
© 2021, Bible Translation and Literacy
Bible Translation and Literacy