Asat 14 - Samburu

Etilikoitie Paulo o Barnabas te lkerenket oji Ikoniam

¹ Kore apa inia nataase ta Antiok naa keinyiaka sii aasai te Ikoniam. Ketijing'a Paulo o Barnabas atua Sinagogi ee Lyiaudi nelikoo payie eiruk ltung'ana kumo, Lyiaudi o Lgirriki.

² Kake kore lolo Lyiaudi oaatanya eiruk, neinyoyie loreren meibaii looiruko Yeso.

³ Newueni Paulo o Barnabas teinie aajo rra elikoo Lomon Supati te mpijan, eirichakino Laitoriani. Neitodol Laitoriani ninche sipata ajo, kore rerei le munyani enye naa kedede aicho ngolon naasie taa nkaik enche nkitodolunot naaitodolu nkitoo enye o mbaa e nking'asia.

⁴ Neoro ltung'ana le ilo kerenket aajing lbata mbata ee Lyiaudi, nejing lkulikae mbata ee Lkipaareta.

⁵ Nenyok Lyiaudi o lolo kulie oreren o larikok lenche aaitam Lkipaareta sina nejo entar too soito metuata.

⁶ Kake kore payie eyielou inia, neisig aaya ltauja lenche, nepuo lkerenket le Lisitira o Derbe o nkopi naamanita inie, naatii mbata e Likaonia,

⁷ nelikoo Lomon Supati te inie.

Etilikoyie Paulo o Barnabas te lkerenket le Lisitira o le Derbe

⁸ Kore apa te lkerenket le Lisitira, naa ketii lpayian otiiwuaki etigiligile leitu aikata elo tee nkejek.

⁹ Naa kore eirorita Paulo, newur nkiyiaa ainining ninye, neing'or ꞉Paulo ilo tung'ani nedol ajo keata nkurukoto naidim neichiunyieki.

¹⁰ Nebuaaki ajoki, <> Nejo dum, neng'asu alo.

¹¹ Kore payie edol ltung'ana inia nataasa Paulo, nebuak lturrur to nkutuk ee Likaonia aajo, <>

¹² Neipot Barnabas aajo nkai enche naji Seus, nejo Paulo Ermes nkae ai aitoki enche, amu kore tee ninche pukurare naa Paulo oirorita.

¹³ Kore nkaji e inia ai naji Seus naa ketii oriong e ilo kerenket. Neyau ꞉laitainoni lenye la lasar lmong'i o ntapuka naairina tee mbene nkutuk e ltim payie eitai lasar tenebo o ltung'ana, aaitaki Paulo o Barnabas.

¹⁴ Kake kore payie ening lolo Kipaareta inia, nekij nankan nekuetiki lolo tung'ana ejoito,

¹⁵ <

¹⁶ Kore too ntowuon naaicha, naa keichoo loreren meima nkoitieii enche,

¹⁷ kake keitodolua ake koon nkata pooki easita mbaa supati. Keichoo ntae nchan naing'uaa keper, neiteleng larin neitiemu ntae ta ndaa, neiput ntae ng'ida ltauja.>>

¹⁸ Kake kore abaki eirorie ꞉Paulo ninche aiko nejia, pecheu eibooitie lolo tung'ana eitu eitaki ninche lasar.

¹⁹ Nepuonu lkulikae Yiaudi ta Antiok o Ikoniam nerrepaki lolo tung'ana metara Barnabas o Paulo. Nenang Paulo aar too soito, neikurtutaa aaipung'ie taatua ilo kerenket ejo ketua.

²⁰ Kake kore payie epuonu looiteng'eni aaigilu ninye, neinyuototo nerrinyo alo ilo kerenket. Neikenyu nelo o Barnabas, lkerenket le Derbe.

Etuchukote Paulo o Barnabas Antiok e Siria

²¹ Kore payie elikoo Paulo o Barnabas Lomon Supati te Derbe, neaku lkumo looiteng'eni, nechuko ninche aailiep aapuo Lisitira neitoki aapuo Ikoniam o Antiok e Pisidia.

²² Neitogol ninche ltauja loo lolo ooiteng'eni aarreten payie ewueni taatua inia nkurukoto ejoki, <>

²³ Negelu ꞉Paulo o Barnabas larikok tee nenia anisani neen nkutukie aaomonoki, nepiki atua nkaina e Laitoriani ilo otipika ꞉lolo arikok nkurukoto.

²⁴ Neimaa Pisidia, nepuo aabaki mbata e Pampilia.

²⁵ Kore payie eidip aatilikoi Lomon Supati te lkerenket le Perga otii inie, nedoyio aapuo lkerenket le Atalia.

²⁶ Neitoki aapuo te inie te meli, nelang'aki Antiok e Siria. Naa te ilo kerenket apa etipikaki ninche nkaina e Nkai, meing'ura ninche to munyani enye payie etum aataas ilo siaai oidipa.

²⁷ Kore payie ebaki ninche inie, neiturrurru nkanisa pooki tenebo, neliki ntoki pooki naitaasa ninche ꞉Nkai, neliki aajoki, ketoboloka ꞉ninye lkulie oreren nkoitiei payie etum aairuko laitoriani.

²⁸ Nebik te inie aajo rra o looiteng'eni.