3 Yoana 1 - Samburu

Nkirorokino

¹ Kore ana palai naa lochi payian arrarri eing'uaa. Kaairoroki iyie Gayo, sotua lai lacham te ndedei.

² Sotua lai lacham, kaomon payie eitibirari ntoki pooki te iyie niaku bioto te sesen, ana payie kira ltau supat.

³ Naa kating'ide oleng payie eyau lkulie alachera lkilikuai ejo ira ltung'ani oning ndedei o ninkunari taatua ndedei.

⁴ Meatae ng'ida nalang ana ta nanu tananing ajo kepuoito nkera ainien taatua ndedei.

Eterrepaki Gayo tankaraki natereto laisiaayiak le Nkai

⁵ Sotua lai lacham, ira loisiligai te inia nintaasita lalachera, abaki era ninche lomon leiching'a.

⁶ Keitabakita ꞉ninche nkanisa nchaman ino. Ntaasa ninche supati intanap aicho ntoki pooki nayieu to nkoitiei epuoito. Kore inia naa keichiaakino teneasi ta Nkai.

⁷ Amu kore lolo alachera, naa kechomo ninche tankaraki nkarna e Laitoriani meng'amaa ntoki taatua lolo leimeiruk inia arna.

⁸ Naaku keichiaakino payie kiretore ltung'ana laijo kulo, payie kias siaai tenebo taatua ndedei.

Larikoni torno

⁹ Kaigeroka sii nkanisa mbae, kake kore Dioterepes oacham ailiepie koon teinie, naa meng'amaa iyioo.

¹⁰ Naaku kore tanalotu, naitaparru nenia naasita, ewuon airo mbaa torrok naarie iyioo. Tapala duo inia, meng'amaa lalachera, neibooyo sii lolo ooyieu neitoomon ninche. Nemiraa ninche taatua nkanisa.

¹¹ Lacham lai, miduaaya ntokitin torrok kake toduai supati. Kore ilo oas supati naa le Nkai naa kore ilo oas ntorrok naa eitu eyielou ꞉ninye Nkai.

Limunoto supat naipirita Demeterio o nkirorokino e siedi

¹² Kerrepita ltung'ana pooki Demeterio, nerrepita abaki ꞉Ndedei koon. Kore abaki iyioo naa ikintaita limunot enyena supati, niyielo sii iyie ajo kore limunoto ang naa kesipa.

¹³ Kore abaki duo aata mbaa kumo naaigeroki, kake mayieu naaigeroki ta nkalamu o mpalai.

¹⁴ Kaisilig ajo ikiduaa kuna naataana nikiro king'ura nkomomi.

¹⁵ Metaa seriani tenebo o iyie. Ikiroroki iyie ꞉sotuatin lang otii ene. Roroki sotuatin lang pooki le inie, intabaki pooki ng'ae nkirorokino.