2 Timoti 3 - Samburu

Mperot e nkiting'oto

¹ Teyielo ajo kore tee mperot e nkiting'oto, naa kepuku ng'amat naagol.

² Keaku ltung'ana ltung'ana oaacham ake ate aapeny, nelubo ropiyiani, neimer, neikar, nedekicho, nemening ntoiwuo enche, nemeata nache. Nemeitaa toki mbaa e Nkai,

³ negol ltauja, nemeitemeletai, neitarruorrucho nkarn, nemeibooyo ate, nericho, neiba ntoki pooki supat,

⁴ nemeisiligai, nekuetiki mbaa, neiliepie ate, necham rraa e nkop aaitalang Nkai.

⁵ Neitaakino keurie Nkai kake neany eiruk aajo keidim uriata e Nkai aitabai mbaa. Talama ltung'ana ootuwuana lolo!

⁶ Kore lbata loo lolo tung'ana naa ketii looleliakino nkajijik, neitopong'oo ntomonok naamada. Kore kuna toluti naa kepetita ꞉nkirochi ee ng'ok, nerikito ꞉ng'uarrat kumo naapaapaacha,

⁷ neyieu ninche nkiteng'ena nkata pooki, kake nemeidim aikata aateyielo ndedei.

⁸ Kore ana apake naibooitie ꞉Yanes o Yameres Musa, eibooitie sii kulo lewa ndedei, netarroitie mparrunot enche neitong'orita nayieuni to nkurukoto ang.

⁹ Kake merokure epuo ninche neodo too kuna, amu keibalai madai enche too ltung'ana pooki ana apa netiu madai e Yanes o Yameres.

Eichoo ꞉Paulo Timoti nkitaarriyiana

^10-11 Timoti, kore aaitamitae sina naatumuto mbaa naagol te lkerenket le Antiok o le Ikoniam o le Lisitira, naa ikirukurukore ake iyie nanu, iduaaya nkiteng'ena ai niduaaya naikunari o nyuata ai o nkurukoto o ng'iriata o nchaman o nkitachoto ai. Kalo sina sa eitu ang'iri? Kake kore eyia, kaatalakua ꞉Laitoriani taatua pooki.

¹² Naa kore pooki ooyieu newueni eurie Nkai taatua Kristo Yeso, naa keitami sina,

¹³ kake kore ltung'ana torrok o lasapak naa kepuo ake kue aarroyo oleng, esapicho, nesapi sii ninche.

¹⁴ Kake kore iyie, towuana naa taatua nenia nikinteng'enaki nitisipua, amu iyielo ajo oong'ae itumie inia kiteng'ena,

¹⁵ niyielo sii ajo iteyielo Lkigerot Sinyat ang'asu apake ira nkerai. Kore lolo Kigerot naa ikindimie taa ng'en payie ijeu iiruk Kristo Yeso.

¹⁶ Kore lkigerot pooki sinyat naa keigeroki to utaroto e Nkai, neata tipat payie eiteng'enichiereki, neitaarriyianichieriki, nerretenichiereki, neitubulunyieki ltung'ani meteyielo sipat,

¹⁷ paa kore ltung'ani le Nkai, neaku loterretene oidimieki metaasa ntoki pooki supat.