2 Timoti 2 - Samburu

Sina tankaraki Lomon Supati

¹ Naaku kore naa iyie nkerai ai, togolo taatua munyani natumi taatua Kristo Yeso.

² Naa kore pooki nitining'o ta nanu natejo tekue ltung'ana kumo, oaata sipata taata ee nenia natejo, ntarasaki nkaik ee lewa ooisiligai, ooidim sii aaiteng'ena lkulikae.

³ Naa tama sina tenebo o nanu ana sikarii supat le Kristo Yeso.

⁴ Meatae hoo sikarii oti siaai oirrana aas lkulie siaaitin lamara ake ilo oigerokaki. Amu kore nayieu ninye naa payie eiting'id ilo kitok lenye.

⁵ Kore ilo okuet neisul te nkueteta naa meitoki etum, tenemekuet ana nayieu nkitanapat e inia kuetata.

⁶ Kore ltung'ani onyok aas siaai la lchampa, naa ninye lekue oyieri payie etum orati e ndung'ure.

⁷ Taparrai najoito, amu ikincho iyie Laitoriani ng'eno taa mbaa pooki.

⁸ Taparru Yeso Kristo, oitipiwuaki taatua lootuata nera laa lmakui le Daudi ana nejo Lomon Supati lalikorita.

⁹ Kore tankaraki nalikorita kulo Omon Supati naanya sina ana maateeni eji kara laitarruoni. Kake meena rerei le Nkai.

¹⁰ Naa kore tankaraki inia, kang'iri mbaa pooki tankaraki lolo ootegelua ꞉Nkai, payie etum sii ninche njeunoto natii atua Kristo Yeso tenebo o nkitoo ee ntarasi.

¹¹ Kore ele rerei naa keirukoi: Tanaa ikituata apa tenebo o ninye, naa ikintoki kenya aaichu tenebo o ninye.

¹² Tanaa iking'iri, naa ikintoricho kenya tenebo o ninye. Naa tanaa ikimiki ninye, nemiki sii kenya ninye iyioo.

¹³ Naa tinimikisiligai iyioo, naa keisiligai ake ninye nkata pooki, amu meidim atanya ajo mera ilo oara.

꞉Laisiaayiani oiting'id Nkai

¹⁴ Ntaparru ltung'ana kuna baa, nintaarriyianicho oleng tekue Nkai, payie meichankara aanya larrabal loo rereii. Kore inia chankar, naa ne pecheu, neitarruoo lolo ooning.

¹⁵ Tonyuaa taa ilo oatachamayie Nkai, ilo aisiaayiani lemenya anyit, olimu aitibiraki rerei le ndedei.

¹⁶ Topong'o mbaa naanya ltung'ana nemeata tipat, amu kore lolo pooki otii atua nenia baa naa keitalam ate Nkai oleng.

¹⁷ Naa kore rerei lenche, nebulaa ana moyian naji nayiengi. Kore atua lolo tung'ana, naa ketii Imenayo o Pileto.

¹⁸ Ketung'aitie ninche ndedei near nkurukoto ee lkulikae, ejoito keidipa mpiunoto ee lootuata ataasai.

¹⁹ Kake kore nkitamanyunoto nemeigusugus natuuno ꞉Nkai naa keitache, neata kulo kigerot oojo, <> naa <>

²⁰ Kore atua nkaji kitok naa mara ake masaa e saabu o ne nkocholai naatii, kake ketii sii noo nkeek o ne mparpar. Keasieki mbata siaai e tipat neasieki nkulikae siaai lamara le tipat.

²¹ Kore pooki ng'ae oitoorere koon nenia tokitin torrok, naa keaku masaaita naasieki siaai le tipat, naitaaki sinyati, nera ne reto to lkitok lenye, neidim lkitok lenye ataasichere te siaai pooki supat.

²² Talama ng'uarrat torrok ee ltung'ana leleru, ninyok aaku ltung'ani loosipat, oisiligai, niata nchaman o seriani, tenebo o ꞉lolo ooipot Laitoriani taa ltauja supati.

²³ Tapaachere rereii le madai oiro ltung'ana meata sipata amu iyielo ajo keyau larrabal.

²⁴ Naa kore laisiaayiani la Laitoriani meyiere payie enya larrabal, kake payie eaku ltung'ani oibor ocheke to pooki ng'ae, nera laiteng'enani supat, neata ng'iriata.

²⁵ Kore lolo lemeyieu mbaa enyena, neichiaakino payie eiteng'en ninche to mborron, ejo kebaki neicho ꞉Nkai ninche munyani enye meibelekenyata aayielou ndedei,

²⁶ netum mparrunot supati aaing'uaa rruachet e chitani, naibung'a ninche metaasa ana nayieu ꞉ninye.