2 Petero 3 - Samburu

Mparri e Laitoriani

¹ Ltung'ana lainien lacham, kore ana palai, naa mpalai ai e are naigeroka ntae. Naa kore too kuna pala pukura, kasaan aputu ntae entaparricho taa mparrunot inchi supati!

² Kore nayieu naa payie aitaparru ntae lomon ootejo apa Loibonok sinyat le Nkai ewuon eng'or, naitoki sii aitaparru ntae nkiteng'ena ee lkipaareta linchi, inia kiteng'ena naichoo ninche ꞉Laitoriani o Laitejeunoni lang.

³ Kore nalang pooki enteyielo nchere, kepuku ltung'ana oikordodicho tee mperot e nkiting'oto. Naa kore ninche keirukurukore ng'uarrat enche aaikordodicho

⁴ ejo, <>

⁵ Kore epuoito kue ejo nejia, nerikino aajo rerei le Nkai oyewua metaa keatae loing'ang'e o nkop naing'uaa nkare, neitibiraki ta nkare.

⁶ Ketumuta apa Nkai nkop te rerei lenye o ta nkare, apa payie eitaya nkare.

⁷ Kore ake aitoki te ilo rerei, kerrip Nkai chumata o nkop e taata ana ntoki e tipat. Keitaanyuta nkima ana meyeu inia parri nadung'oki nkiguana nemut ltung'ana lemeurie ninye.

⁸ Kake emirikino ltung'ana lainien lacham ana toki nabo, nchere kore ta Laitoriani mparri nabo, naa ketuwuana larin nkalup nabo, naa kore larin nkalup nabo netuwuana mparri nabo.

⁹ Kore Laitoriani naa mara keimalmal eitu eitabaya lekutuk lenye, ana nayaita lkulikae tung'ana aajo keimalmal. Keng'iri Nkai taa ntae amu meyieu payie eatae lkuti ooidaari, kake payie etum pooki ng'ae airriidu.

¹⁰ Kake kelotu mparri e Laitoriani meitekini ana lapurroni. Naa kore inia parri, keimin chumata te nkikirikiroto sapuk, neidakie lapa o ndama o lakir ꞉nkima, nepejori ntoki pooki naitibiraki to nkop.

¹¹ Naa kore amu keidakieki kuna tokitin pooki aaiko inji, meata ajo miakuku ltung'ana oowueni te sinyaticho neurie Nkai,

¹² iyanyutata inia parri e Nkai, ninyoknyok aaitesieku meyeu. Kore kenya inia mparri naa keidakieki chumata te nkima, nechola lapa o ndama o lakir epejori.

¹³ Kake ikianyita chumata ng'ejuk o nkop ng'ejuk ana natejo Nkai te lekutuk lenye, inie naa kore ntoki pooki, netiuu ake ana nayieu ninye.

¹⁴ Naaku naa lacham lainien, kore ianyutata nenia, entonyok payie etumi ntae iatata sotua o Nkai, miatata ntoki nakurrieki ntae nimiatata ntioto.

¹⁵ Enkena aajo keng'iri Laitoriani payie ejeu ltung'ana! Naa nejia apake etiaka ntae lalache lang Paulo likicham, payie eigeroki ntae te ng'eno naichooki ninye.

¹⁶ Keiger ninye ana bae taa mpala enyena pooki nkata naimaki kuna baa. Kore too kuna pala, keatae mbaa naagol ning'unoto, naa kore ltung'ana lemeitoki eyielo nechal, nekord ana chiaake neiko lkulie kigerot sinyat, naaku ꞉inia naidakie ninche.

¹⁷ Naaku naa, lacham lainien, kore amu iyielolo ana ewuon eitu easai, errita ate payie meitopong'oo ntae nkiteng'ena e sapare ee lolo aitarruok, nirria aaing'uaa nkitachoto inchi.

¹⁸ Kake entubulu taatua munyani o yielounoto e Laitoriani o Laitejeunoni lang Yeso Kristo. Metaa nkisisa nenye, taata o ntarasi! Aamin.