2 Petero 1 - Samburu

¹ Kore ana palai naa keing'uaa Simon Petero, oara laisiaayiani o Lkipaaret le Yeso Kristo. Kairoroki ntae lolo oichoo ꞉Nkai meiruko ana mbae e tipat aajo, kore Nkai ang nara Laitejeunoni Yeso Kristo naa loosipat, ana ake taata nikiruk.

² Metoponiki Nkai ntae munyani o seriani, ipuopuo kue aayielou ninye o Yeso Laitoriani lang.

Mbulunoto taatua ng'eno e Nkai

³ Keichoo iyioo Nkai pecheu to ngolon enye ntoki pooki nayieuni te nkichon, neichoo sii aitoki iyioo ntoki pooki nayieuni payie kitum aaturia Nkai to nkoitiei naiting'id ninye. Naa kore nkoitiei nikitumie inia, naa yielounoto e ilo oipoto iyioo te nkitoo o to ngolon enye.

⁴ Naa kore te inia golon o nkitoo enye, neichoo iyioo lekutukie lenyena oata tipat nera kutuaa oleng. Paa kore tee nenia nitumtum aatang'ar mpukunoto e Nkai, indipa apa aailanya mutai natii ana kop tankaraki ng'uarrat.

⁵ Naa kore tankaraki ana bae, entonyok entoponiki nkurukoto inchi lwuenet supat, niponikiki lwuenet supat yielounoto e rerei le Nkai,

⁶ niponikiki yielounoto e rerei le Nkai nkubooroto e koon, niponikiki nkubooroto e koon ng'iriata, niponikiki ng'iriata uriata e Nkai,

⁷ kore uriata e Nkai, niponikiki nchaman ee ltung'ana ooiruko Yeso, niponikiki nchaman ee ltung'ana ooiruko Yeso nchaman ee lkulie tung'ana pooki.

⁸ Naa kore tanaa iatata kuna pooki, nebulaa taatua ntae, naaku miakuku ltung'ana oaachal lemeiu lng'anayio laa asat supati, kake iyielouu Laitoriani lang Yeso Kristo oleng.

⁹ Naa kore lemeata kuna, naa medolicho aitibiraki, tung'ai abaki inia, kera modooni katukul, tankaraki ketirikine ajo keidipaki aaituko ng'ok enyena e apa.

¹⁰ Kore naa tankaraki ana lalachera o nkanachera, mbae e tipat abaki oleng tininyoknyok aasipaki ate nchere keipoto netegelua ntae Nkai, naa kore tiniasias kuna, nimirriaa aikata.

¹¹ Amu teinia oitiei eicho ntae ꞉Nkai entijing nkitoria nemeiting e Laitoriani o Laitejeunoni lang Yeso Kristo pecheu.

Keisiligai naibon e Nkai

¹² Naaku kayieu chiaake naitaparru ntae kuna baa, abaki iyielolo ninche, nintachoto aipidaki taatua inia dedei naichooki ntae.

¹³ Naa kajo keichiaakino payie ainyoyie ntae aitaparru kuna baa ewuon aichu,

¹⁴ amu kayielo ake ajo ketaa payie aper, ana /naaibalakinyie Laitoriani lang Yeso Kristo.

¹⁵ Naa kanyok paa kore abaki achomo nanu, naa ipuopuo ake aaparru kuna baa pooki.

¹⁶ Amu mara nkatinin naatamawuaki ta ntakano nikirukurukore apa kimbalakinyie ntae ngolon naata Laitoriani lang Yeso Kristo o neiko ninye tenechukunyie kenya, kake ikira iyioo lootodua sipata e nkitoo enye.

¹⁷ Ketang'amayie ninye nkanyit o nkitoo ta Nkai Papa naata nkitoo naaisul pooki, apa payie ejo, <>

¹⁸ Naa kore iyioo, ikitining'okita ate ilo toilo oing'uaa chumata kitii tenebo o ninye to ldonyuo sinyati.

¹⁹ Naaku ikiata abaki taata sipata oleng e lkilikuai oatamautua apa loibonok le Nkai. Naa keisupat taa ntae tining'orng'or inia natejo ninche, amu inji etuwuana ana lkilang'ilang'et oilu ta naimin ana meyeu wong'an e siran, neipung'u lakira le siran taa ltauja linchi.

²⁰ Kore narepaa pooki, keyiere niyielouu aajo meatae hoo naibon too Lkigerot sinyat nayewuo eing'uaa nduata ee loibonok le Nkai maate.

²¹ Amu eitu aikata eibonicho tankaraki ake nayieu neibonicho, kake kore netiu, Ltau Sinyati otirikoyie ltung'ana meiroro ake inia naichoo Nkai meiroro.