2 Ltesalonike 3 - Samburu

Etoomonua Paulo nkomono

¹ Lalachera o nkanachera, kore nesiedi, entoomonoki iyioo mechomo rerei la Laitoriani kue asiooyo neyanyiti, ana netaasa apa taatua ntae.

² Niomonono sii, payie elakuni iyioo too ltung'ana oaas nemeichiaakino o ltorrok, amu mara pooki oaata nkurukoto.

³ Kake keisiligai Laitoriani, naa keitogol ntae, neirrita ntae te ilo torno.

⁴ Ikiata sipata ta Laitoriani aajo kore ntae, naa iasitata nenia nikintanapita ntae, nipuoitoto kue iasitata.

⁵ Meteteoki Laitoriani ltauja linchi meteyielo nchaman e Nkai o ng'iriata e Kristo.

Nkitaarriyiana too lolo lemeyieu neas siaai

⁶ Lalachera o nkanachera, ikintaarriyian ntae ta nkarna e Laitoriani lang Yeso Kristo, payie ipaacherere pooki alache lemeyieu neas siaai, nemeirukurukore nkitaarriyiana nitang'amaitie tee iyioo.

⁷ Naa iyielolo ana nayiere ninkoko tiniduayaya iyioo, amu eitu apake kintachalio kitii tenebo o ntae.

⁸ Kake kore siaai likitaasa, naa ikitaasa kuarie o parkiji to nyuata o te nkinyinyiret, payie mikiaku nkirochi taa ntae.

⁹ Mara apa tankaraki mikiata nkidimata niking'amarie reto taa ntae kitaasa inia, kake payie ikintodol ntae nkitanyanyukoto supat niduayaya.

¹⁰ Naaku, kore abaki apa kitii tenebo o ntae, naa ikinchoo ntae ana kitanapata, <>

¹¹ Amu ikining nchere ketii lkulie linchi oowueni te nchalan, nemeitoki eas mara ake peeirriki ate atua mbaa namara nkunenche.

¹² Kore ltung'ana ootuwuana lolo, naa ikintanap, nikireki ta Laitoriani Yeso Kristo meitirring'ata aas siaai, nenya nkinyinyiret enche.

¹³ Kake kore naa ntae lalachera, eminauru iasias mbaa supati.

¹⁴ Naa teneatae ltung'ani taa ntae lemening mbaa nikitejo tana palai, enteyielo ilo tung'ani nimibung'arere payie enya ninye anyit.

¹⁵ Naa emiing'or ninye ana lmang'antita, kake eing'odia ana lalache linchi.

Nkirorokino e siedi

¹⁶ Kore Laitoriani openy seriani, naa meichoo ninye ntae seriani nkata pooki, too nkoito pooki. Metaa Laitoriani tenebo o ntae pooki.

¹⁷ Kore ana, naa nkirorokino ai koon, naigero nanu Paulo ta nkaina ai, naa ninye saei lai ta mpalai ake pooki naigero nanu. Nejia chiaake aiko tanaiger.

¹⁸ Metaa munyani e Laitoriani lang Yeso Kristo tenebo o ntae pooki.