2 Ltesalonike 2 - Samburu

Nchukunoto e Yeso

¹ Lalachera o nkanachera, kore naipirita nchukunoto e Laitoriani lang Yeso Kristo o neikoni teneiturrurri iyioo mataa tenebo o ninye, naa ikilej ntae

² payie minchocho meigusugusie ntae mparrunot tanaa eituria ntae mbae najo etabawua inia parri e Laitoriani, eji atuwuana iyioo eing'uaa, pee era te ltau, tanaa te rerei, tanaa ta mpalai.

³ Emincho metaa keatae ntoki nasapie ntae ltung'ani, amu melotu inia parri ewuon eitu ebau ang'as nkata e nkibooroto kitok ee mbaa e Nkai, neibalunyieki ilo aitarruoni oikenakaki mutai.

⁴ Kore ilo mang'antita naa keiliepie koon aiterepaa ntokitin pooki naaipoti aajo nkaitok o pooki toki nasaii, payie ewuon ninye to lorika ta nkaji e Nkai elikoo ajo kera Nkai.

⁵ Amaa, miparrurru aajo katilika apa ntae kuna baa ewuon atii tenebo o ntae?

⁶ Naa iyielolo taata inia naibokito ninye, payie etumi aibalunyie tenebau nkata enye.

⁷ Amu kore inia golon naisudoro e ntoki pooki nemeichiaakino naa keasicho taata, kake kore ilo oibooyo inia, naa keiboorita ana metabaki nkata naiwuang'ieki.

⁸ Kore inia kata, neibalunyieki laduo aitarruoni, ilo oidakie ꞉Laitoriani Yeso te nkiyeng'ata e nkutuk enye, neichu ninye te nkitoo enye, tenechukunyie.

⁹ Kore ilo aitarruoni naa kelotu to ngolon e Chitani, neas mbaa kutuaa o asat naitodolu nkitoo o mbaa e nking'asia e sapare

¹⁰ o sapare pooki e ntorroni too lolo ooidaari te nkiminata, amu ketanya echamaa ndedei payie eitejeuni.

¹¹ Kore tankaraki inia, naa keicho ꞉Nkai ninche metung'ai nkoitiei e ndedei, payie etum aairuko sapare.

¹² Naaku, kore leitu eiruk ndedei nechamaa nkoitiei torno, naa kedung'okini nkiguana torno.

¹³ Kake keyiere nikirrinyoki iyioo Nkai nache nkata pooki tankaraki ntae lalachera oaacham ꞉Laitoriani, amu ketegelua ntae Nkai ta ng'asunoto payie ijeuu aaku sinyat ta Ltau Sinyati o tinirukuruk ndedei.

¹⁴ Keipuotua ntae Nkai too lomon supati likitilikita ntae, payie itumtum nkitoo e Laitoriani lang Yeso Kristo.

¹⁵ Naaku naa, lalachera o nkanachera, entacho emingusgus naa embung'a nkiteng'ena nikintarasakita ntae pee era to nkutuk anaa ta mpalai.

¹⁶ Kore Laitoriani lang Yeso Kristo koon o Nkai Papa lang, ilo oacham iyioo, neitogolo iyioo ltauja ntarasi, neichoo iyioo siligi supat to nkoitiei e munyani,

¹⁷ naa meitogolo ltauja linchi, neitacheyie ntae taatua asat o rerei pooki supat.