2 Ltesalonike 1 - Samburu

Nkirorokino e Paulo

¹ Kore nanu Paulo o Silpanas o Timoti naa ikiroroki nkanisa ee Ltesalonike nawuon taatua Nkai Papa lang o Laitoriani Yeso Kristo.

² Metaa munyani o sotua naing'uaa Nkai Papa lang o Laitoriani Yeso Kristo tenebo o ntae.

Nkiguana nadung Nkai ta nkata e siedi

³ Lalachera o nkanachera, keyiere nikincho Nkai nache nkata pooki ana naichiaakino tankaraki ntae, amu kebuluta nkurukoto inchi oleng. Kore sii nchaman niatata likae o likae, naa keponari taatua ntae pooki, paa meatae lobo linchi lemebakita.

⁴ Naaku taa, kore iyioo ikilach tankaraki ntae taa nkanisani e Nkai. Amu kore abaki eitami ntae sina oleng niatata sina kitok, naa iatata ng'iriata o nkurukoto.

⁵ Kore kuna pooki, naa keitodolu ndung'oto nasipa e nkiguana e Nkai, payie etumi aitaa ntae looichiaakino nkitoria e Nkai, inia naichoo metaa keitamitae ntae sina.

⁶ Kore amu neesipat Nkai, naaku keitalak aitam sina lolo ooitam ntae sina,

⁷ neicho ntae ooitamitae sina nkiyeng'iyeng'ata tenebo o iyioo. Kore teneibalunyieki Laitoriani Yeso eing'uaa chumata tenebo o lmalaikani le ngolon enye,

⁸ neiteme lolo lemeiyielo Nkai o lemening Lomon Supati la Laitoriani lang Yeso. Keasai ana te nkima nailu.

⁹ Kore ninche, naa keitemei ta arata ee ntarasi, neitalami nkomom e Laitoriani o nkitoo kitok e ngolon enye.

¹⁰ Kore kenya nenia baa naa keasai tenelotu Yeso inia parri, meichoo ꞉sinyat lenyena ninye nkisisa neicho lolo pooki ooiruko ninye nkanyit. Naa itii sii ntae inie amu iruko mbaa nikitilimutua naaipirita ninye.

¹¹ Kore tankaraki inia, naa ikiomonokita ntae nkata pooki payie eikenaki ntae Nkai ang looichiaakino te inia naipotieki ntae. Nikiomon aitoki paa kore mbaa pooki supati niyieuu o siaai linchi e nkurukoto, neitabaya to ngolon enye,

¹² payie itumtum ntae aaisisa nkarna e Laitoriani lang Yeso, nerrepi ntae o ninye ana naichiaakino munyani e Nkai ang o ne Laitoriani Yeso Kristo.