2 Lkorinto 8 - Samburu

Entaa ltung'ana ooleng

¹ Kore naa taata lalachera o nkanachera ang, ikiyieu niyielouu inia munyani naichoo ꞉Nkai nkanisani e Makedonia o mbaa naataasa inia munyani e Nkai.

² Ketetemaki ninche oleng te sina oimaitie, kake kore eyia, keisapuk oleng ng'ida enche naa kore era loomena oleng, neitaitua nkichoorot enche te leng'on kitok tankaraki naitaitua ate.

³ Amu kalimu nanu sipata nchere, keichoitie ninche inia naaidim aaichooi neitoki aaiterepaa. Kore te yieuna enche maate,

⁴ neitirrichaki iyioo aomonu mpaach naretie sinyat le Nkai otii Yerusalem.

⁵ Neas ninche nalang nikisiligita apa aajo keas, amu kore te yieuna e Nkai, ate etang'asa tekue aicho Laitoriani, neitoki aaicho iyioo.

⁶ Nikiroyie taa aitaarriyian Tito, payie eidip ele siaai le nchaman oatang'asua apa taatua ntae.

⁷ Kore ana niborere taa mbaa pooki, aata nkurukoto kitok, nera lkumo linchi ltung'ana arriyiak to nkuroroto, niatata ng'eno kitok nirara ltung'ana ooterretenete katukul, naa keikitok nchaman inchi tee iyioo, naaku keichiaakino payie iakuku looleng te ele siaai le nchaman.

⁸ Majoito taa nchere eji meata ajo miasias inia, kake kore payie alikita ntae nyuata ee lkulie naa payie atum atetema ntae asipu tanaa kedede nchaman inchi.

⁹ Amu iyielolo ntae munyani e Laitoriani lang Yeso Kristo, laa kore abaki era parakuoni netaa laisinani tankaraki ntae, paa kore aimu sina lenye neitaa ntae parakuo.

^10-11 Ana nduata ai tana bae! Kore te elde ari apa oichunye, naa mara ake itang'asutua aaret sinyat le Nkai, kake ntae lekue oaata yieuna niasiesie inia. Naaku entonyok naa taata endipa ilo siaai metaa kore napa yieuna niatata, nintabayaya te nkiririkinoto ee ntokitin niatata.

¹² Kore tanaa keichooyo ltung'ani ta ltau supat, naaku keng'amaroi inia kichooroto enye teneitai te nkiririkinoto e inia naata, namara te nkiririkinoto e inia nemeata.

¹³ Mayieu naiteleliaki lkulikae nitumtum ntae sina, kore nayieu naa payie irisioii o ninche.

¹⁴ Iatata taata ntae ntokitin kumo naalang niyieuu metaa indimdim aateret lolo lemeitoki eata oleng, paa kore nkata nemeitoki iatata ntae, neret ꞉ninche ntae eata ninche inia kata naalang naayieuu. Naaku kore te inia oitiei nirisioi.

¹⁵ Ana nejo Lkigerot Sinyat, <>

Eipaayieki Tito Korinto

¹⁶ Kaicho Nkai nache natipika ltau le Tito yieuna naretie ntae ana naata chiaake nanu.

¹⁷ Kore amu keyieu Tito oleng payie eas siaai le Nkai naa mara ake inia nikitiakita meisabaki ntae etang'amayie, kake ketachama ninye makoon payie elotu adol ntae.

¹⁸ Naaku ikireuta likae alache tenebo o ninye, orrepitae taa nkanisani pooki tankaraki siaai loo Lomon Supati oaasita.

¹⁹ Namara ake inia apeny, kake ketegelutua ninye nkanisani payie eirukurukore iyioo kinapita nenia nkichoorot e reto naatipikaki iyioo nkaik maing'ura, payie eisisi Laitoriani nedoli aajo ikiyieu nikiret ninche.

²⁰ Ikitaasa ana payie metum hoo iyioo kusaka tankaraki nikinko tiniking'or kuna kichoorot naitaitua lalachera o nkanachera te leng'on.

²¹ Amu mara ake tekue Laitoriani apeny kiyieu iyioo payie kias sipat, kake abaki tekue ltung'ana.

²² Kore sii aitoki ikireuta likae alache lang tenebo o ninche, likitisiputua too nkoitieii kumo o taa nkatitin kumo aajo keata yieuna naasie siaai e Nkai. Nelus naa taata tankaraki keata siligi kitok taa ntae.

²³ Kore Tito naa lboitiei lai likiasicho tenebo aaret ntae, naa kore lolo kulikae alachera naa nkanisani naatereutua, neyaki sii Kristo nkanyit.

²⁴ Naaku entoduaa ninche nchaman inchi, payie edol nkanisani neyielou aajo kedede rrepeta nikirrepita ntae.