2 Lkorinto 6 - Samburu

¹ Kore kiasicho tenebo o Nkai, ikintaarriyian ntae payie meaku munyani e Nkai nitang'amaitie ne pecheu.

² Amu nchi ejo Nkai: <> Tining'o! Ana taa nkata ning'amaa omom ta Nkai, naa ana mparri e njeunoto!

³ Mikiyieu hoo nikintanyamal ltung'ana ta mbae naje nikias, payie meatae mbae nawochieki iyioo te siaai lang kira laisiaayiak le Nkai.

⁴ Kake kore to ntoki pooki nikias nikintodolu aajo ikira laisiaayiak le Nkai, kintirring'a aang'iri tinikitum nyamalitin, o tenegoliki iyioo mbaa o tenenya iyioo sina.

⁵ Iking'iri sii iyioo ana laisiaayiak le Nkai teneidong'i iyioo neeni te jila o tenetum iyioo lturrurri loo ltung'ana ooricho o tinikinyok aas siaai te nkinyinyiret o tinikilau njuo o tinikiata sumach.

⁶ Ikintodolu aajo ikira laisiaayiak le Nkai, aaku ltung'ana oowong nikiata ng'eno o ng'iriata o lng'er nerikoo iyioo Ltau Sinyati, nikintodol ltung'ana nchaman nadede.

⁷ Nikilikoo Lomon le Nkai oodede to ngolon enye, kimbung'uta lalem o long'o e sipata e Nkai, era masaa ang nikinyayie larrabal.

⁸ Ikintodolu naa aajo ikisiaaita Nkai oo eyanyiti iyioo tanaa emeni, oo eitarruorri iyioo nkarn tanaa errepi. Kewaki iyioo ana ltung'ana oasapicho kake nikiro iyioo sipata,

⁹ ana lemeyieloi kake neyieloi iyioo, ana loaataa keye kake newuon ake kinchu. Ketoduaki iyioo ana looitemioki kake neitu eri iyioo matuata,

¹⁰ ana looisinanio kake niking'ida nkata pooki, nedoli iyioo ana laisinak kake nikintaa lkumo parakuo meteyielo mbaa e Nkai, netuwuana meitoki kiata kake nkunanang ntokitin pooki.

¹¹ Lokorinto kulo! Ikirorie ntae aibalakinyie mbaa nikicham sii ntae oleng.

¹² Mikimboorita hoo iyioo ntae, kake iking'amaa ntae katukul taa ltauja lang. Kore tanaa keatae looibooricho naa ntae!

¹³ Entaas naa ana nikintaasita iyioo ntae, entang'amai iyioo te nchaman.

Emiaku nabo o lolo lemeiruk Nkai

¹⁴ Emumbung'a aaku nabo o lolo lemeiruk Nkai. Amaa, kaa aboicho eata sipata o ntorni? Tana keidimai payie echula wong'an o naimin?

¹⁵ Kening'o Kristo o Chitani? Tana kaa chula eata loiruko Kristo o leitu eiruk?

¹⁶ Kalo ning'o eata nkaji e Nkai o nkaitok e sapare? Amu ikira iyioo nkaji e Nkai naichu. Ana netejo Nkai koon, <>

¹⁷ Naaku kejo Laitoriani, <

¹⁸ Naaku nanu Papa linchi, niakuku sii ntae nkera ainien, nejia ejo Laitoriani openy ngolon.>>