2 Lkorinto 3 - Samburu

¹ Amaa, ikingilita dei aitoki aarrep ate? Ana ikiyieu iyioo mpala ana lkulie tung'ana naaitodol ntae aajo oong'ae kira, tanaa mpala inchi nilikinyienyie lkulie tung'ana aajo oong'ae kira?

² Ikiparru ntae taatua ltauja lang oleng, naa ntae mpalai ang naning'u neisom pooki ng'ae.

³ Keibala nchere irara ntae mpalai naing'uaa Kristo. Kore payie eigeri inia palai aaimunyie nkisiayiare ang, naa eitu eigerieki lkalamu kake ltau le Nkai naichu eigerieki, namara too soito dapachi eigero kake taa ltauja loo tung'ana.

⁴ Keichoo iyioo Kristo nkitieunoto ta Nkai natuwuana inia.

⁵ Mikindim hoo aataparrai nikinko tinikias ele siaai eji atuwuana nkidimata ang kiasie, kake kore nkidimata ang naa Nkai eing'uaa.

⁶ Keidimie ninye iyioo mataa laisiaayiak lo lning'o ng'ejuk, lemeirichakino nkitanapat naaigero kake Ltau Sinyati eirichakino. Amu kore nenia kitanapat naigero naa lkiye eyau, kake Ltau Sinyati oicharu nkichui ng'ejuk.

⁷ Kore lning'o musana naa keata apa nkitanapat naaisiayieki Nkai, naaigeroki too soito dapachi. Kore payie eichoruni neibalunye apa nkitoo e Nkai, abaki eirokicharita wong'an e inia kitoo to nkomom e Musa, kake kepi apa oleng ana metaa meidim ltung'ana le Isirael aatukurraki ninye nkonyek. Amaa pasa tanaa nejia ewua wong'an e nkitoo e inia kisiaayiere nayau lkiye,

⁸ kebaa sa wong'an e nkitoo e nkisiayiare e Ltau Sinyati!

⁹ Amaa tanaa keikitok nkitoo naata apa inia kisiaayiere nayau nkiguana torno, kebaa sa nkitoo e inia kisiaayiere ng'ejuk naitaa iyioo loosipat tekue Nkai!

¹⁰ Naaku naa kore napa kisiaayiere naata nkitoo naa merekure eata nkitoo teneitanyanyukieki ana kisiaayiere naata nkitoo kitok oleng.

¹¹ Naa amaa tanaa kore wong'an e inia nairokicharita neyewuo eata nkitoo natiu nejia, kebaa era kitok wong'an e nkitoo e inia kisiaayiere nabik!

¹² Naaku kore naa tankaraki nikiata siligi laijo ilo, naaku ikiro meitoki kiurie.

¹³ Mikias naa iyioo ana apa Musa oisiap nkomom enye ta nanka payie meing'or ltung'ana le Isirael inia wong'an eirokichari aichunye.

¹⁴ Kake keitogoloki apa nkuechi enche metaa mening'u. Kore o taata teneisomi Lkigerot Sinyat lo lning'o musana tekue ltung'ana, ewuon ake etii inia anka, nemebolori amu taatua Kristo ake eitaini.

¹⁵ Naa keisiapita inia anka o taata ltauja loo ltung'ana nkata pooki naisomi nkitanapat e Musa.

¹⁶ Kake kore ake teneibelekenyakino ꞉ltung'ani Laitoriani neiwung'ieki inia anka.

¹⁷ Kore ilo Aitoriani naa Ltau Sinyati, naa kore ake netii ilo Tau Sinyati la Laitoriani, netii lakunoto.

¹⁸ Kore iyioo pooki ooing'or nkitoo e Laitoriani ana kitaap too nkomomi nemeisiapa, neibelekenyi iyioo matutuwuana nkitanyanyukoto nabo o ninye, nelo nkitoo enye kue aaponikino iyioo. Kore ana, naa Laitoriani eing'uaa oara ninye Ltau Sinyati.