2 Lkorinto 2 - Samburu

¹ Naaku katumuta apa nanu inia kata ajo maisabaki ntae aitanyamal aitoki ltauja linchi.

² Amu kore tanaitanyamal ntae, ng'ae sa likae laaidim naaiting'id mara ake lolo laitanyamala?

³ Naaku tankaraki inia payie aigeroka apa ntae ana naigero, amu mayieu apa nalotu inie nitii maaitanyamala ꞉lolo tung'ana ooichiaakino duo naaiting'id, amu kaata sipata naipirita ntae pooki ajo kore ng'ida ai naa ng'ida ee ntae pooki.

⁴ Naa kaigeroka ntae aata ltau oirochi nenyamal, naata lkiyioi namara payie aaitanyamal ntae, kake payie iyielou neba nchaman nacham ntae.

Entapaliki ilo oataasa ng'oki payie menyamalu oleng

⁵ Tanaaitanyamala nanu ltung'ani, naa mara nanu eitanyamala, kake keikunanyi aitanyamal ntae pooki. Katejo nejia payie mapon nanu lomon.

⁶ Kore inia wochoto natang'amaitiei lkumo linchi aajo keichiaakino payie etum ilo tung'ani, neitemeito ninye aaiko nejia, naa keitiemu ninye inia.

⁷ Kake kore naa taata keichiaakino payie ipalikiki nirretenten ninye payie minchocho metanyamala oleng ana meture katukul.

⁸ Kore tankaraki inia naa kaitaarriyian ntae payie ichamaa aaitodol ninye aajo ichamcham.

⁹ Kaigeroka apa ntae payie atum atisipu nkitachoto inchi, nayielou tanaa ikiningining menya ajo nyo ajoki ntae.

¹⁰ Kore pooki ng'ae lipalikiki ntorrok naataasa naa katapalika sii nanu. Amu kore inia natapalika tanaa keatae sa ntoki nayiari napaliki, natapalika tekue Kristo tankaraki ntae,

¹¹ payie metumoki Chitani atupurro iyioo amu ikiyielo aajo keitorrok losegin lenyena.

Laisiaayiak lo lning'o ng'ejuk

¹² Kore payie abaki lkerenket le Tiroa alikoo Lomon Supati le Kristo, naa kaatobolakaki nkoitiei naasie siaai la Laitoriani,

¹³ kake nanyamalu oleng ta ltau lai tankaraki neitu ebau lalache lai Tito oata lomon linchi. Naicho taa ltung'ana lesere te inie, nainyuototo alo Makedonia.

¹⁴ Kake kaicho Nkai nache amu kore taatua Kristo, keisula ninye, nerikoo iyioo, neasichere iyioo meteyielo ltung'ana ninye to ng'oji pooki ana lasar orropili.

¹⁵ Amu keitorropil iyioo Kristo tekue Nkai. Ikirropil kitii atua lolo ooitejeuni, nikisamis taatua lolo ooidaaya.

¹⁶ Kore too lolo ooidaari, neisamis lolo omon likilikorita, neyaki ninche lkiye laa ntarasi, kake kore too lolo ooitejeuni nerropil, neyaki ninche nkichui ee ntarasi. Naa ng'ae sa eichiaakino siaai laijo ilo?

¹⁷ Kore iyioo, mikituwuana lkulie kumo ooitarruo rerei le Nkai aayiarie dupoto, kake ikilikorita mikisudorita toki tekue Nkai, kitii atua Kristo, ana ltung'ana oing'uaa Nkai.