2 Lkorinto 13 - Samburu

Nkitaarriyiana e siedi

¹ Kore taata naa nkata e uni ana nalotuta aisabaki ntae. Kejo Lkigerot Sinyat, <>

² Kore apa payie aisabaki ntae nkata e are, katilika lolo oaasita ng'ok ana apake naasita tekue o ntae lkulikae pooki, naitoki taata aigil ajoki ntae abaki matii nanu inie makoon, nchere kore tanaitoki alotu nitii naa mapal ntae.

³ Mapal naa ntae tankaraki iyieuu sipsip nchere, keiro Kristo taatua nanu. Mechal Kristo teneoch tanaa teneret ntae, kake keata ngolon taatua ntae

⁴ Amu kore abaki tanaa te nchalan etechoki Yeso neri metua to lmusalaba, keichu to ngolon e Nkai. Naa iyielouu aajo kore kitii iyioo atua Kristo naa ikichal, kake ikinchu tenebo o ninye to ngolon e Nkai.

⁵ Entisipu ate tanaa itii atua nkurukoto nadede. Entetem ate! Amaa, miyielolo aajo keti Yeso Kristo atua ntae? Tanaa miyielolo, naaku eitu iimiim inia temata.

⁶ Kaisilig ajo iyiololo aajo ikiima iyioo inia temata.

⁷ Ikiomonoki ntae Nkai payie miasias hoo ntoki torno, namara taa payie etuwuana ikiima ntemata, kake payie iasias ntae mbaa naaichiaakino abaki etuwuana eitu kiim iyioo.

⁸ Meatae nikindim aataas payie kimbooyo sipata, kake mbata e sipata ake kindim aatijing.

⁹ Kore tanaa ikichal iyioo nigolgol ntae, naa iking'ida. Naa ikiomonoki ntae payie irrinyuonyo aaipid nkoitieii nchi.

¹⁰ Kore payie aigero kuna baa ewuon alakuaniki ntae, naa payie eaku mapi tanatum ntae, amu kore nkitoria naaichoo Laitoriani naa payie aitubulunyie ntae namara payie aarie ntae.

¹¹ Kore naa lalachera o nkanachera ainien, kajo ana aidipita. Entingidata, ninyoknyok aaibelekeny nkoitieii inchi, nining'ining nkitaarriyiana ai, nining'ong'o, niwuenini te seriani. Naa keaku Nkai e nchaman o ne seriani tenebo o ntae.

¹² Erorokinoto to ngusoto sinyati.

¹³ Keiroroki ntae sinyat pooki le Nkai.

¹⁴ Metaa munyani e Laitoriani lang Yeso Kristo o nchaman e Nkai Papa o nchula e Ltau Sinyati tenebo o ntae pooki.