2 Lkorinto 11 - Samburu

Paulo o lkipaareta le sapare

¹ Kaisilig ajo ing'iriri tanairorie ntae abaki tanairo taata peneu ana lmadai. Kaamon ntae, enting'iri!

² Ituwuanana ntae ana ntito naichooyieki meyema lpayian obo, naa kore ilo payian naa Kristo. Naaku, mayieu hoo ltung'ani olotu aitopong'oo ntae, amu Nkai naatipika lom, matolomo ntae payie mindapachariri ake aaing'uaa ilo payian oichooki ntae, kake payie ichamcham ninye apeny.

³ Kore ana apa natasapa lasurai to loseg lenye Awa, kaurie ajo keitarruorri mparrunot inchi metaa mekure irara ltung'ana ooisiligai, lemeata ntioto to sotua oaata o Kristo.

⁴ Eji kore ntae, naa ing'iriri ltung'ani pooki olotu nitii alikoo lomon le likae Yeso lamara ilo likitilikita iyioo ntae, ning'amaa sii likae tau oaapaachere Ltau Sinyati, ning'amaa lkulie omon supati lamara lolo Omon Supati litang'amaitie apa tee iyioo.

⁵ Madol hoo nanu koon atuwuana kara kini too lolo kipaareta kulda ooji kutuaa.

⁶ Keidim naa mara arriyia to nkiroroto, kake kayielo netiu mbaa. Naa /ikimbalakinyie ntae chiaake to nkoitiei pooki nenia baa nikiyielo.

⁷ Amaa, kataasa apa ng'oki payie aitodoyio koon nailiepunyie ntae aliki Lomon Supati pecheu?

⁸ Katupurro nkulie anisani ang'amaa ropiyiani enche, payie atum aisiaayia ntae.

⁹ Naa kore apa atii tenebo o ntae, eitu hoo aaku nkirochi to ltung'ani obo, abaki mabore. Amu kore lalachera ootuo eing'uaa apa Makedonia, naa ninche laatereto aicho ntoki pooki naatong'orika. Naaku eitu apake aaku nkirochi taa ntae, namaaku aikata!

¹⁰ Nemeatae hoo loidim aiboi inia kikarra ai too lubot pooki e Akayia. Kaata sipata e inia amu keti sipata e Kristo atua nanu.

¹¹ Aanyo payie mayieu reto inchi? Aa ijoijo macham ntae? Keyielo Nkai ajo kacham ntae!

¹² Kore ltung'ana ooyiaya mpaach naikarrie aajo kerisio o iyioo to nkoitiei naasie siaai, naa kayieu naoru ninche inia paach naikarie. Naaku kaas siaai le Nkai, naloito ake kue aas pecheu.

¹³ Kore ltung'ana laijo lolo, naa lkipaareta le sapare ninche, nera laisiaayiak oasapicho, nera ltung'ana ooibelekeny ate aaitaakino lkipaareta le Kristo.

¹⁴ Naa mara nking'asia inia amu kore abaki Chitani naa keibelekeny koon aitaakino lmalaika le wong'an!

¹⁵ Naaku meing'asicho sii teneibelekeny laisiaayiak lenyena ate aaitaakino laisiaayiak le sipata e Nkai. Kore kenya tesiedi kelaakini ninche nairirikino asat enche.

Sina oimayie Paulo ana lkipaaret

¹⁶ Kaitoki taa ake ajo emijo lmadai ara tanairo aiko inchi, kake tanaa ijoijo lmadai ara, enining'ooki naa ake ana ninkoko tininining lmadai, payie atum aikarra peneu.

¹⁷ Kore tanaikar aiko nchi naa mairorita ana loutarita ꞉Laitoriani, kake ana lmadai.

¹⁸ Kake kore tankaraki natii lkumo ooikar ana naaikar ltung'ana, kaikar sii nanu.

¹⁹ Kore amu irara ntae ng'eni oleng, naaku itachamaitie aang'iri lmada!

²⁰ Kesipa ing'iriri ntae teneitae ntae rrindiki o teneisimarieki ntae ntokitin o teneitamai ntae o tenemeni ntae o teneitami ntae anyit.

²¹ Eji mara kadol dei anyit tanaibalie ajo ikichal apa oleng metaa mikindim aataas inia. Kake kore naaitieu lmang'antita lai aikarrie, naa kaitieu abaki nanu. Kore airorita ajo nejia, naa kairorita ana lmadai.

²² Amaa ninche, loo Lburania era? Kara sii nanu. Kera ninche ltung'ana loo Isirael? Kara sii nanu. Kera ninche le ntalipa e Abraam? Kara sii nanu.

²³ Kera ninche laisiaayiak le Kristo? Kore tanairo aiko nchi, naa kairorita ana lmadai. Kara laisiaayiani lenye alang ninche, natonyuaa aas siaai alang ninche. Kaateenaki te jila alang ninche, naaidong'oki alang ninche, natinyikaka nkatitin kumo lkiye.

²⁴ Nkatitin imiet aaidong'o Lyiaudi aawoch ochot 39,

²⁵ nkatitin uni aaidong'o Rroman naa nkata nabo aatejoki entar matua too soito. Nkatitin uni atidira melin neye amutmuta taatua mpaso. Kore nkata nabo namut nkuarie pooki o mparkiji te nkeper e nkare taatua mpaso nagut.

²⁶ Kalo echi oleng nkopi kumo, naajo nkare iwa tee seriak, naajo lapurrok o ltung'ana lainien o loo lkulie oreren entar matua. Katumo ana tee lkerenketi o te lkees o ta mpaso, o taa lalachera le sapare.

²⁷ Natonyuaa te nkinyinyiret aas siaai. Kore nkatitin kumo naa katala njuo, natumo sumach o nkure, netii nkatitin nateena nkutuk, naatama nkijepe namaata nankan naaitiemu.

²⁸ Kore etii nenia, naa kaata nkirochi mperot pooki amu kaaichooki maing'ura nkanisani pooki.

²⁹ Ng'ae ilo oachal payie maiseyie inia chalan enye? Amaa tenetopong'ori ltung'ani, mara kaning mion oleng ta ltau lai?

³⁰ Kore tanaa meatae ajo maikar, naikar tankaraki mbaa naaitodolu nchalan ai.

³¹ Keyielo Nkai nara Papa la Laitoriani lang Yeso Kristo, ilo oisisi ntarasi, ajo masapicho.

³² Kore apa ati lkerenket le Damasikas, neicho larikoni otii taabori nkitoria e lkinkii Aretas sikarini meterripo ilo lkerenket pooki, payie aatum aaibung'a.

³³ Kake naapiki atua nkikapu naaitodoyiori aaimie long'u le suntai e ilo kerenket, naisig aing'uaa ninye.