2 Lkorinto 10 - Samburu

Etong'oroyie Paulo koon ajo kera Lkipaaret

¹ Kejo lkulikae linchi, <> Kaomon naa nanu ꞉Paulo ntae to mborron o to supaticho e Kristo,

² payie meaku kore tanalotu naaku kapi, amu kajo katumore te mpijan lolo oojo ikiwueni iyioo ana looitore mpukunoto torno e tung'ani.

³ Kore abaki kira iyioo ltung'ana, naa mikinyia larrabal ana neiko ltung'ana tenenya.

⁴ Kore masaa ang nikinyayie larrabal naa mara masaa ee ltung'ana, kake keata ngolon ta Nkai nikindakie neogol ee lmang'ati le Nkai. Nikindakie mparrunot e sapare,

⁵ nemeatae nkilacha nailiepunyie koon aibooyo ltung'ana payie meyielou Nkai, nimikindakie. Nemeatae inia naparraa ltung'ani nimikumbung, metining'o Kristo.

⁶ Naa kore payie eaku itining'o iyioo, nimbung'bung lomon lang katukul, nikirretena payie kinteme pooki ng'ae oas ntorno.

⁷ Oriong ee mbaa dei ake ing'oritata ntae. Kore ilo oata sipata ta ltau lenye ajo kera le Kristo, naa keichiaakino payie eitoki aparraa nchere kore ana nara ninye le Kristo, naa ikira sii iyioo.

⁸ Kore abaki tanaa kaikonyi aaikarrie nkitoria naichoo iyioo Laitoriani maitubulunyie ntae namara nikiarie ntae, madol hoo anyit.

⁹ Kajoito ana payie mikidoldol atuwuana kayieu naituria ntae taa mpala ainien.

¹⁰ Amu keatae loojo, <>

¹¹ Keichiaakino neyielou lolo tung'ana aajo, kore nikitiu iyioo taa mpala ang, naa nejia ake abaki kitiu tinikipuonu nitii.

¹² Mikintieu taa iyioo aatipik ate atua lolo tung'ana oorrep ate, tanaa kintinyunyukore ate ninche. Kemada ninche amu ketemie ate ate, eing'or ake netiu ninche maate.

¹³ Kore iyioo mikinkar aaiterepaa inia naichiaakino, kake ikinkar nimikinterepaa nkikarra ang ilo siaai lang oichoo iyioo Nkai. Naa kebaki ilo siaai lang atua ntae.

¹⁴ Mikilang'ita iyioo aarepaa siaai lang tinikibaki ntae eji atuwuana eitu apa kibaki nitii, kake iyioo apa lekue ooitabakita ntae Lomon Supati le Kristo.

¹⁵ Mikinkarrie iyioo siaai ootonyuaa lkulie aas, kake kore siligi lang naa nchere kore ebulu nkurukoto inchi, neilepu nkitoo ang neichori iyioo nkanyit alang apake tekue, nemerepaa naichiaakino iyioo.

¹⁶ Naaku ikipuo kue alikoo Lomon Supati too nkopi natii teidialo ntae, amu mikiyieu nikinkarrie siaai oichoo ꞉Nkai lkulikae metaasa.

¹⁷ Kejo Lkigerot Sinyat, <>

¹⁸ Amu mara ilo orrep koon etachamayieki, kake ilo otum rrepet ta Laitoriani.