1 Yoana 5 - Samburu

Nkurukoto taatua Nkerai e Nkai

¹ Kore pooki oiruk ajo kore Yeso naa Kristo, ilo Aitejeunoni oaanyutae apa, naa inoti le Nkai. Naa kore ilo oacham Papa naa kecham sii inia Kerai enye.

² Naa ana kiyielounyie aajo ikicham nkera e Nkai: tinikicham Nkai nikimbung nkitanapat enyena.

³ Amu tinikicham Nkai, naa ikimbung nenia kitanapat, nemeirochi ninche.

⁴ Kore ntoki pooki naino ta Nkai naa kemir mbaa e nkop. Naa kore ntoki namir nkop, naa nkurukoto ang.

⁵ Ng'ae dei ilo omir nkop, mara ake ilo oiruk ajo kera Yeso Nkerai e Nkai?

⁶ Ninye ilo oyewuo ta nkare o to lodo, Yeso Kristo. Naa eitu elotu ta nkare apeny, kake ta nkare o to lodo.

⁷ Naa Ltau Sinyati olimu sipat, amu kore ilo Ltau naa ndedei.

⁸ Keatae lasipak okuni oolimu sipata aa Ltau o nkare o lodo, naa kening'o ninche pukura uni.

⁹ Iking'amaa limunot ee ltung'ana, kake kore limunoto e Nkai naa ninye nkitok. Ketilimua Nkai sipata naipirita Nkerai enye, naa inia limunoto enye.

¹⁰ Kore loiruk Nkerai e Nkai naa keata sipata naipirita inia limunoto ta ltau lenye. Naa kore ilo lemeiruk Nkai naa keitasapicho ninye, amu eitu eiruk inia sipata natilimua Nkai, naipirita Nkerai enye.

¹¹ Naa ana inia sipata nchere keichoo iyioo Nkai nkichon nemeiting naa kore ana kichon naa atua Nkerai enye etii.

¹² Kore loata Nkerai neata nkichon, naa kore lemeata inia Kerai e Nkai nemeata inia kichon.

¹³ Kaigeroka ntae kuna baa, ntae taa ooiruk nkarna e Nkerai e Nkai, payie iyielouu aajo iatata nkichon ee ntarasi.

Nkomono ana nayieu Nkai

¹⁴ Naa ana nkiteunoto nikiata ta Nkai, nchere kore tinikiomonu ntoki te nkiririkinoto e yieunoto enye, naa kening iyioo.

¹⁵ Naa kore tankaraki nikiyielo aajo kening iyioo to pooki nikiomonu, naaku ikiyielo aajo ikitumo te ninye nenia pooki nikitoomonutua.

¹⁶ Tenedol ꞉ltung'ani lalache lenye eas ng'oki nemeorie ninye Nkai ntarasi, keyiere neomonoki, naa keicho ꞉Nkai lolo oas nenia ng'ok nkichon nemeiting. Keatae ng'oki naor ltung'ani o Nkai ntarasi, namajo metoomonokini inia.

¹⁷ Kore mbae pooki torno naasi naa ng'oki, kake mara ng'oki pooki naorie ltung'ani Nkai.

Mbaa e siedi e ana palai

¹⁸ Ikiyielo aajo, kore pooki oino ta Nkai naa mechekino aas ng'oki, kake keirrita ꞉ilo inoti le Nkai metaa meiseyie ilo mang'antita ninye.

¹⁹ Nikiyielo aajo ikira le Nkai, naa kore nkop pooki naa keti taabori nkitoria e ilo mang'antita torno.

²⁰ Nikintoki aayielo aajo keyewuo Nkerai e Nkai, neichoo iyioo ning'unoto payie kindim aateyielo ninye oara odede. Naa ikitii atua ilo odede, atua Nkerai enye Yeso Kristo. Ninye naa Nkai nadede nera nkichon ee ntarasi.

²¹ Nakera ainien, errita ate taa nkaitok e sapare.