1 Yoana 2 - Samburu

Kristo laretoni lang

¹ Nkera ainien, kaigerokita ntae ana payie miasias ng'ok. Kake teneas lobo linchi ng'oki, naa ikiata laretoni oitacheki iyioo tekue Papa, aa Yeso Kristo ilo loosipat.

² Naa kera ninye lasar loo ng'ok ang, namara nkunanang ake aapeny kake no nkop pooki.

³ Nikiata sipata aajo ikiyielo ninye tinikimbung nkitanapat enyena.

⁴ Kore pooki ng'ae ojo, <> nemeibung nkitanapat enyena naa kesapicho, nemeti ndedei atua ninye.

⁵ Kake kore ilo oibung rerei lenye, naa kedede taatua ninye etoboreyia nchaman e Nkai. Naa te inia kiyielou aajo ikitii atua ninye.

⁶ Kore pooki ng'ae ojo keti atua ninye, naa keichiaakino neikunari to lototo ana apa neikunari ninye.

Nkitanapata e nchaman

⁷ Lacham lainien, mara nkitanapata ng'ejuk aigerokita ntae, kake musana niatata apake ta ng'asunoto. Kore inia kitanapata musana naa ilo rerei lindipa aatining.

⁸ Naa kore sii eyia, kaigerokita ntae nkitanapata ng'ejuk, inia nadede te Yeso o taa ntae. Amu kore naimin naa keipung'uto, neiluta inia wong'an nadede.

⁹ Kore ilo ojo keti atua wong'an neiba lalache lenye, naa kewuon ake etii atua naimin.

¹⁰ Kore pooki oacham lalache lenye naa keti atua wong'an, nemeata ntoki taatua ninye naitopong'oo metaasa ng'oki.

¹¹ Kake kore loiba lalache lenye naa naimin etii, neloito taatua naimin, nemeyielo neloito amu keitomodoo ninye ꞉naimin.

Emichamu nkop o ntokitin enyena

¹² Nakera ainien, kaigerokita ntae, amu etapalikaki ntae ng'ok inchi tankaraki nkarna e Yeso.

¹³ Naigeroki ntae loo papa, amu iyielolo ntae ilo otii apake ta ng'asunoto. Naigeroki sii ntae lbarnot, amu itimira ilo torno. Naigeroki ntae nkera, amu iteyieloutua ntae Papa.

¹⁴ Naigeroki ntae loo papa, amu iteyieloutua ilo otii ta ng'asunoto. Naigeroki ntae lbarnot, tankaraki igolgol, netii rerei le Nkai atua ntae, nitimira ilo torno.

¹⁵ Emicham nkop anaa ntokitin natii atua ninye. Amu kore ilo oacham nkop naa meti nchaman e Papa atua ninye.

¹⁶ Amu kore pooki toki nati nkop, aa ng'uarrat e sesen o ng'uarrat ee nkonyek o nkimerra e ntokitin naata ltung'ani, naa ne nkop mara na Papa.

¹⁷ Naa kore nkop o ng'uarrat enyena naa keich, kake kore ilo tung'ani oas nayieu Nkai naa kebik ntarasi.

Errita ate too loiba Kristo

¹⁸ Nakera, etaa nkata e nkiting'oto ana, naa kore ana nitining'o aajo kore ilo oiba Kristo naa kelotuta, eidipa naa taata lkumo ooiba Kristo aaotu. Naa ana oitiei kiteyielounyie aajo ketaa nkata e nkiting'oto.

¹⁹ Keipung'o ninche taatua iyioo, kake mara apake lkulalang. Amu tanaa kera lkulalang, anata etii tenebo o iyioo. Kake keipung'o aaing'uaa iyioo payie etumi aateyielo aajo mara pooki ng'ae oara lalang.

²⁰ Kake kore ntae, keidipa ilo obo Sinyati aela ta Ltau Sinyati, naa iyielolo pooki ndedei.

²¹ Kore payie aigeroka ntae ana palai, naa majoito miyielolo ndedei, kake tankaraki iyielolo nintokiki sii aayielo aajo mepukunyie sapare atua ndedei.

²² Ng'ae pasa oasapicho mara ake ilo ojo, <>? Kore loiba Kristo naa ilo oany Papa o Nkerai enye.

²³ Kore loany Nkerai naa meata abaki Papa, kore loibalunyie Nkerai naa keata sii Papa.

²⁴ Enchoo metaa kebik inia nitining'o ta ng'asunoto taatua ntae. Amu kore tenebik inia taatua ntae, naa ibikbik sii ntae taatua Nkerai o taatua Papa.

²⁵ Naa kore lekutuk oitaka ninye iyioo naa ele: nkichon ee ntarasi.

²⁶ Kaigeroka naa ntae kuna baa aparru lolo oonyokita aaitopong'oo ntae.

²⁷ Kore naa ntae, kemanya Ltau Sinyati atua ntae, ilo litang'amaitie apa payie eel ntae ilo Sinyati, nimiyieuu hoo neiteng'en ntae likae. Kake kore ana naiteng'en ntae Ltau Sinyati naipirita mbaa pooki, nera nkiteng'ena enye ndedei namara sapare, keiteng'ena sii ntae nchere payie iwuenini taatua ninye!

²⁸ Nakera! Kore taata, entibik taatua ninye, paa kore teneibalunyieki, nikintieu aitacho tekue ninye, nemenya iyioo anyit to lotunoto enye.

²⁹ Kore tanaa iyielolo aajo kera ninye lopeny sipat, iyielolo sii aajo kore pooki oas sipata naa ꞉ninye otiiwua.