1 Timoti 3 - Samburu

Larikok le nkanisa

¹ Keisiligai ele rerei, nchere kore teneyieu ltung'ani neaku larikoni le nkanisa, naa siaai supat eyieu.

² Keyiere naa, neaku larikoni ltung'ani lemeata nakurrieki, lpayian oyema ntomononi nabo ake, neipidari, netemu mbaa, neata nkanyit, neitoomonicho, neyielo aiteng'enicho,

³ namara lamerani, nemericho kake kebor, nemeichankara, nemelubo ropiyiani,

⁴ neyiere payie era ltung'ani oidim ataramata nkang enye, neiteng'en nkera enyena to nkoitiei supat, meyanyita nening ninye katukul.

⁵ Amaa tenemeyielo ltung'ani ataramata nkang enye, kaji eiko tenaramat nkanisa e Nkai?

⁶ Meyiere nera ltung'ani oiruko det, payie meiliepie koon nedung'okini nkiguana torno ana apa Chitani.

⁷ Kake keyiere neata rrepet supat too ltung'ana lamara le nkanisa, payie menya anyit nerriakino rruachet e Chitani.

Laisiaayiak le nkanisa

⁸ Kore sii lkulie aisiaayiak le nkanisa, naa keyiere payie eaku ltung'ana oaayanyitai, nera ltung'ana ooibala rereii, namara lamerak, namara ltung'ana oanya monko.

⁹ Keyiere payie eibung inia dedei naisudoro, naibalunyieki to nkurukoto emusoo aajo meata nakurrieki.

¹⁰ Neyiere ang'as payie etemi ninche tekue, paa tenemeata nakurrieki, neichori meeisiaaicho.

¹¹ Kore sii ntomonok enche, naa keyiere payie era naayanyitai, namara nairo mbaa torrok too lkulie tung'ana, neipidari, neisiligai taatua mbaa pooki.

¹² Kore laisiaayiani le nkanisa, naa keyiere payie era lpayian oyema ntomononi nabo ake, neramat nkera enyena o nkang enye aitibiraki.

¹³ Kore lolo oaas siaai lenche aaitibiraki, netumoki ate lorika le nkanyit o nkiteunoto kitok to nkurukoto naata taatua Kristo Yeso.

Lng'ope le nkurukoto ang

¹⁴ Kore aaigerokita iyie ana kitaarriyiana, kaata siligi ajo kalotu nitii kuna naataana.

¹⁵ Kake kore tanaimalmala, niyielou te inia kitaarriyiana neiko ltung'ana tenewueni ta nkaji e Nkai. Ninye naa nkanisa e Nkai naichu, lng'ope o nkitamanyunoto e ndedei.

¹⁶ Keng'amaa pooki ng'ae nchere kore neiko ꞉ltung'ani teneyanyit Nkai naa keisudoro, nera netipat oleng: /keibalunyieki ninye era ltung'ani, neibalunyie ꞉Ltau Sinyati ajo loosipat, nedol ꞉lmalaikani. Nelikori taatua loreren, neiruki to nkop, neiliepieki aaya nkitoo e chumata.