1 Timoti 2 - Samburu

Nkitaarriyiana naipirita sayiata e Nkai

¹ Kore nang'asunyie tekue, naa kaitaarriyianicho paa kore tankaraki ee ltung'ana pooki neichirakini Nkai, neomoni, neomonokini ltung'ana, neichori Nkai nache.

² Kaitaarriyianicho metaasi inia too lkinkii o too lolo pooki otii nkitoria payie kiwueni to mborron o te seriani tee nkichoni ang, kiurie Nkai nikitum nkanyit to ntoki pooki nikias.

³ Kore inia naa keisupat neng'amaroi tekue Nkai Laitejeunoni lang,

⁴ ilo oyieu ninye payie ejeu ltung'ana pooki neyielou ndedei.

⁵ Amu nabo ake Nkai naa lobo laitutumoni le Nkai o ltung'ana, Kristo Yeso laa ltung'ani ninye,

⁶ oitayia nkichui enye alakunyie ltung'ana pooki. Kore ana, naa payie eaku limunoto tenebau nkata nategeluaki.

⁷ Kaaitaaki lalikoroni o lkipaaret payie atum atilikoi inia limunoto. Naa kesipa najoito mara sapare, kaaitaaki laiteng'enani loo loreren payie aiteng'en ninche nkurukoto o ndedei.

⁸ Kayieu naa kore lewa, neomon to ng'oji pooki, neiliepie nkaik enche naasinya meata ngoro, nemeata nchankar.

⁹ Nayieu sii ntomonok neisikarra aaitibiraki ta nkanyit o te nkiririkinoto. Namara te nchatata ee lpapit tanaa ta saabu tanaa taa masaa naagol nkinyiang'a tanaa taa nankan naagol nkinyiang'a eisikarra,

¹⁰ kake taa asat supati, naairirikino ꞉ntomonok naajo keyanyit Nkai.

¹¹ Naa enchoo meiteng'eni ntomonok egira aainining'icho neitodoyio ate katukul.

¹² Maicho meiteng'enicho ntomonok tanaa sii eitore lewa, kake payie egira ake aainining'icho.

¹³ Amu Adam apa eitibirua ꞉Nkai tekue, neijipunyie ntomononi naji Awa.

¹⁴ Namara apa Adam etasapa ꞉Chitani, kake ntomononi etasapa, neas ng'oki.

¹⁵ Kake keitejeuni ninche eiu nkera, tenewuni taatua nkurukoto o nchaman o sinyaticho, to nkoitiei naichiaakino.