1 Timoti 1 - Samburu

Nkirorokino naing'uaa Paulo

¹ Kore ana palai naa nanu Paulo eing'uaa, ilo oataa Lkipaaret le Kristo Yeso te nkitanapata e Nkai nara Laitejeunoni lang o Kristo Yeso oara siligi lang.

² Kaairoroki iyie Timoti nkerai ai nadede taatua nkurukoto. Metaa munyani o lng'ur o seriani naing'uaa Nkai Papa o Kristo Yeso Laitoriani lang, tenebo o iyie.

Nking'odia naipirita nkiteng'ena e sapare

³ Kaareki ajoki iyie payie ibik te lkerenket le Epeso, ana naatiaka apake aloito Makedonia, payie intanap lbata loo tung'ana teinie pee meiteng'enicho nkiteng'ena e sapare,

⁴ anaa ejing atua natinin o mbaa naaipirita lmakui nemeata nkiting'oto. Kore nenia atinin o nenia baa, naa keyau nkipara nemeata tipat, alang teneyau nkiteng'ena e Nkai nayielouni to nkurukoto.

⁵ Kore yieuna e ana kitaarriyiana ang, naa payie eipung'u nchaman naing'uaa ltau supat o ltau oyielo ajo meata nakurrieki o nkurukoto nadede.

⁶ Keatae lolo oaatapaachere ana, neibelekenyakino rereii lemeata tipat.

⁷ Neyieu neaku laiteng'enak loo nkitanapat e Nkai, kake nemeyielo nejo tanaa mbaa naaimaki te mpijan.

⁸ Ikiyielo aajo keisupati Nkitanapat tanaa keasichiere ltung'ani aitibiraki.

⁹ Nikiyielo nchere, eitu eitaini Nkitanapat tankaraki loosipat kake tankaraki laitarruok o lolo lemening'icho. Neitayiaki sii tankaraki lolo lemeurie Nkai o laasak loo ng'ok, o tankaraki aitoki lolo lemeitaa Nkai toki o lolo oaacham mbaa e nkop, o tankaraki lolo oaar ntoiwuo enche near sii lkulie tung'ana.

¹⁰ Neitayiaki sii tankaraki ltung'ana oaas loloito o lewa oaas loloito o lkulie lewa o loomir ltung'ana metaa rrindiki o lolo oaasapicho o lolo oaanya lmumai le sapare o nkae toki pooki napaachere nkiteng'ena nadede.

¹¹ Nejia ejo Lomon Supati le nkitoo e Nkai ang namayiana, lolo Omon laaichooki nanu mataa laing'urani.

Nache e Paulo tankaraki munyani e Nkai

¹² Kaicho Kristo Yeso Laitoriani lang nache tankaraki kaatoduaa ajo kaisiligai, naaicho ngolon naagelaki nkisiaayiare enye.

¹³ Kore abaki ara apa nanu ꞉ltung'ani odek Kristo, naitam nkanisa enye sina nara ltung'ani oricho, kake kaaing'urrieki nanu amu kataasa nenia pooki mayielo, namaata nkurukoto.

¹⁴ Netubukua Laitoriani lang munyani enye tenebo o nchaman o nkurukoto nikiata taatua Kristo Yeso.

¹⁵ Naa kesipa ele rerei neisiligai, neichiaakino payie eng'amari nchere, keyewuo Kristo Yeso nkop payie eitajeu ltung'ana loo ng'ok, naa nanu ojool lolo pooki.

¹⁶ Kore abaki apa aa nanu ojool lolo ltung'ana loo ng'ok, naa keitodolua Kristo Yeso newua ng'iriata enye ta nanu. Naa keaku ana nkitanyanyukoto too lolo pooki kenya oopuonu aairuk ninye payie etum nkichon ee ntarasi.

¹⁷ Metaa nkanyit o nkisisa ntarasi o ntarasi no Lkinkii loo ntarasi, ilo lemeye nemelioo laa ninye ake apeny Nkai, Aamin.

¹⁸ Kaaichoo naa iyie Timoti nkerai ai ana kitaarriyiana te risioroto ee rereii le naibon likimpirita iyie, paa kore iparraa ninche, nindim atama ilo arrabal supat loo Lomon Supati,

¹⁹ imbung'uta nkurukoto niyielo ta ltau lino ajo miata nikikurrieki. Ketii lbata ootabarakita aany inia dedei naibala taa ltauja lenche, neidakie nkurukoto enche.

²⁰ Kore taatua lolo naa ketii Imenayo o Alekisanda lolo latung'aka Chitani, payie eng'enu nemeigil aadek Nkai.