1 Petero 5 - Samburu

Nkitaarriyiana taa lpayiani o lkulie tung'ana pooki le nkanisa

¹ Kore ara nanu lpayian le nkanisa, nara sii lobo oata sipata naipirita sina oatama apa Kristo, nara long'arieki nkitoo naibalunyieki kenya, kaitaarriyian naa taata lpayiani linchi le nkanisa ajo inji:

² Errita mboo e Nkai natung'aka ninye ntae entaa laing'urak. Naa kore iasitata inia, eng'ura ninche, mara ana nayieunyieki ntae te ele siaai kake tankaraki nichamaa ilo siaai ana nayieu Nkai, namara sii payie itumiemie ntoki kake tankaraki nichamcham aaisiaayia ninche.

³ Nimimbookiki lolo ootipikaki nkaik inchi nkop, kake entaa nkitanyanyukoto supat naduaaya ninche.

⁴ Naa kore kenya tenelotu Lchekut Kitok, nitumutum nkiraoni e nkitoo nemomuta aikata.

⁵ Kore naa ntae oaara leleru, entodoi ate too lpayiani le nkanisa. Nemeata linchi, pee era lpayian anaa ltung'ani lelerie, lemerretena payie etum aisiaayia likae to mborron, amu, <>

⁶ Entodoi naa ate taabori nkaina nagol e Nkai, payie etum ninye ailiepunyie ntae ta nkata enye.

⁷ Emiing'ach, entung'aki Nkai mbaa pooki naaitanyamal ntae metanapa, amu keing'or ninye ntae.

⁸ Entaa ltung'ana oaaparricho aitibiraki, nirritata ate amu kore lmang'antita linchi Chitani naa kemanaa ana lng'atuny oipurruto, eyiaya ltung'ani oijioo.

⁹ Emboi ninye, mingusgus taatua nkurukoto ang. Iyielolo naa aajo ketipikaki lalachera o nkanachera inchi to nkop pooki, mbaa e sina naatuwuana kuna.

¹⁰ Tinindipdip aaimai sina te nkini kata, kore Nkai napeny munyani pooki, inia naipoto apa ntae te Kristo payie ing'arng'ar nkitoo enye nemeiting aikata, naa kerrinyoki ntae atua mbaa supati, neitogol ntae, neitacheyie payie mingusgus.

¹¹ Metaa ngolon nenye ntarasi o ntarasi. Aamin.

Nkirorokino e siedi

¹² Kaigeroka ntae ana palai dorrop aretito Silas, lalache laiken ajo kera lalache oisiligai. Kaigero aitaarriyian ntae nalimu sipata ajo munyani nadede e Nkai ana. Entacho naa teinia munyani!

¹³ Kore sii nkanisa natii Babilon, nategeluaki ana ntae, naa keiroroki ntae. Neiroroki sii ntae Marko oara nkerai ai.

¹⁴ Erorokinoto to ngusoto e nchaman. Metaa seriani tenebo o ntae pooki otii atua Kristo.