1 Petero 1 - Samburu

Nkirorokino

¹ Kore ana palai naa nanu Petero, lkipaaret le Yeso Kristo eing'uaa. Kairoroki lgelunot le Nkai oaatasachakinete nkopi eiching'a e Pontos o ne Galatia o ne Kapadokia o ne Asia o ne Bitinia.

² Etegelua apa ntae Nkai Papa te yieuna enye eitisiny ntae ta Ltau Sinyati payie irukuruk Yeso Kristo neituk ntae lodo lenye. Meiputa ntae munyani o seriani.

Siligi le nkichon ee ntarasi

³ Meisisi Nkai oara Menye Laitoriani lang Yeso Kristo! Ilo laa te lng'er lenye kitok etiiwuaki iyioo nkata e are, payie kitum siligi oichu tankaraki natipiwua Yeso Kristo taatua lootuata,

⁴ nitumtum sii ntae metaa ninchi mayian nemeiting, nemorroyo, nemeichunye, naitaanyutae ntae te chumata.

⁵ Nerrip ꞉Nkai ntae to ngolon enye, iwuenini to nkurukoto, payie ing'amaa inia jeunoto natipikaki payie eibalunyieki ta nkata e nkiting'oto.

⁶ Naa enting'idata te inia oleng, oo duo abaki aa meata ajo misinanionio tankaraki ntemat kumo niimaa te nkiti kata.

⁷ Kesipuni chiaake soit omiri oji saabu teneimieki nkima, naa keidim saabu nerroyo, kake kore nkurukoto keata tipat oleng alang saabu. Kore kuna temat niimaa, naa itumtum payie esipuni nkurukoto inchi. Kore tanaa kesipa nkurukoto inchi, neaku kenya rrepet o nkisisa o nkanyit teneibalunyieki Yeso Kristo.

⁸ Itachama ntae ninye abaki eitu idoldol, niruko abaki midolitata taata, neiputa ntae ng'ida kitok nemelimunoi

⁹ tankaraki itumutoto inia niruko apa aajo itumtum kenya, aa taa njeunoto ee ltauja linchi.

¹⁰ Kore loibonok le Nkai ooibonutua ana munyani e Nkai naaku ninchi, naa Ketonyua aaing'oru neiparu ana jeunoto.

¹¹ Keing'orutua apa inia naibalunyie ꞉Ltau le Kristo otii atua ninche ewuon eng'or, ajo anu anaa sii netiu inia kata e sina oitami Kristo o netiu nkata e nkitoo kenya naijipu ilo sina.

¹² Keibalakinyie ꞉Nkai ninche nchere kore nenia naaing'oruta naa mara tankaraki ate kake tankaraki ntae. Netamakita sii ntae lolo ootilikita ntae Lomon Supati to ngolon e Ltau Sinyati oirriwuaki te chumata, nenia baa. Kore sii lmalaikani keyieu netum sapipiyiet ee nenia baa.

Entaa sinyat

¹³ Naaku naa entipik siligi linchi katukul inia munyani naichori kenya ntae teneibalunyieki Yeso Kristo, irretenena taa mparrunot inchi aaku ltung'ana oaaparricho aaitibiraki.

¹⁴ Kore tankaraki nirara nkera e Nkai naaning'icho, emirubare naapa ng'uarrat inchi torrok nirukurukorere apa ewuon miyielolo ninye.

¹⁵ Naa kore ana nara ilo oipoto ntae sinyati, naaku naa entaa sii ntae sinyat ta mbaa inchi pooki.

¹⁶ Mara kejo sii Lkigerot nchere, <>

¹⁷ Naa kore tinimpotpot aajo Papa linchi, ilo oiguan pooki ng'ae meata ngela, te risioroto ee asat enche, entewueni to nkoitiei naicho ninye nkanyit irara lapuayak tana kop.

¹⁸ Eitu eitami ntae ropiyiani tanaa masaa naaichunye, aalakunyie taa mbaa inchi nemeata tipat naaitarasakita ntae lmakui linchi,

¹⁹ kake lodo le Kristo oata tipat oleng eitamaki ntae, otuwuana lodo lo lkuo leker, ocho lemeata ntioto.

²⁰ Kore apake ninye, naa ketegeluaki ewuon eitu eng'asu ꞉Nkai aitibir nkop, kake /keibalunyieki taata ta ng'amata e nkiting'oto tankaraki ntae.

²¹ Kore tankaraki inia nataasa ninye, naa iruko Nkai naitipiwua ninye taatua lootuata neicho nkitoo, payie eaku kore nkurukoto o siligi linchi, naaku atua Nkai etii.

²² Kore naa tankaraki intibirita ate aaning ndedei netachamayie ntae Nkai, entachamata katukul taa ltauja supati, payie intodolulu nchaman nadede ana lalachera o nkanachera.

²³ Amu ketiiwuaki ntae nkata e are, namara ta lantararai omutari kake lememutari, aa taa te rerei le Nkai oichu lemeichunye.

²⁴ Amu, <

²⁵ kake kore rerei la Laitoriani naa kebik ntarasi.>> Kore naa ilo rerei, naa Lomon Supati ootilikaki ntae.