1 Ltesalonike 3 - Samburu

¹ Naaku, kore payie kidol nchere merokure kindim aating'iria, nikichamaa aabik nanu o Silpanas te lkerenket oji Aten,

² nikimpaaki ntae Timoti, lalache lang oisiaai Nkai tenebo o iyioo te likoroto ee Lomon Supati le Kristo, meitogolo neitaarriyian ntae to nkurukoto inchi.

³ Naa ikitaasa inia payie meatae linchi oigusgus to nkurukoto enye tankaraki kulo sinaitin oonyeita ntae. Naa iyielolo ntae maate aajo kore kulo sinaitin, naa ketegelakaki apake iyioo.

⁴ Amu kore kitii tenebo o ntae, naa ikitilikita apa ntae aasioki nchere ikitum sina, ana nataase taata, niyielolo sii.

⁵ Tankaraki inia, kore payie eaku merokure aidim ating'iria, nareu Timoti payie ayielou nkurukoto inchi, aurie ajo kebaki netetema ntae ilo atemani, netaa siaai lang le pecheu.

Lkilikuai supat

⁶ Kake kore naa amu eyewuo taata Timoti nikitii eing'uaa nitii, neyaka iyioo lomon supati ooipirita nkurukoto o nchaman inchi, neitoki alimu nchere iparrurru chiaake iyioo to supaticho, iyieuu nidoldol iyioo oleng ana nikiyieu sii iyioo nikidol ntae.

⁷ Naa inia lalachera o nkanachera, paa kore taatua nyamali pooki o sina likitumo, naa /keitogoloki ltauja lang tankaraki ntae, kining'ito nkurukoto inchi.

⁸ Naa ikitopuaa taata kining'ito aajo intachoo aaipidaki taatua Laitoriani.

⁹ Nyo sa kirrinyokinyie Nkai nache te inia ng'ida pooki nikiaata tekue ninye tankaraki ntae?

¹⁰ Kore kuarie o parkiji, naa ikiomonito mikintisia payie kitum mpaach nikidolie ntae nkomomi, nikitum sii aaiputu ntoki natong'oro to nkurukoto inchi.

¹¹ Kore taata, naa metuutaki iyioo Nkai ang Papa koon o Laitoriani lang Yeso nkoitiei nikipuonunyie nitii.

¹² Naa meitubulu ꞉Laitoriani neitodoodooyo nchaman inchi, te likae o likae o too lkulie tung'ana pooki ana nikinkuna iyioo ntae,

¹³ payie etum aitogolo ltauja linchi taatua sinyaticho, nitumtum aataa lemeata ntioto tekue Nkai Papa lang, ta ng'amata e lotunoto e Laitoriani lang Yeso Kristo tenebo o sinyat lenyena pooki. Aamin.