1 Ltesalonike 1 - Samburu

Nkirorokino e Paulo

¹ Kore nanu Paulo o Silpanas o Timoti, naa ikiroroki nkanisa ee Ltesalonike nawuon taatua Nkai Papa o Laitoriani Yeso Kristo, metowuana munyani o sotua taatua ntae!

Nache tankaraki nkurukoto ee Ltesalonike

² Kore chiaake, naa ikincho Nkai nache tankaraki ntae pooki, kiparru ntae to nkomono aang.

³ Kore tekue Nkai Papa lang naa ikiparru nkata pooki inia asata nitaasa to nkurukoto o siaai ogol litonyuaa aas tankaraki nchaman o ninkoko tining'iriri ipikpik siligi linchi atua Laitoriani Yeso Kristo.

⁴ Amu, ikiyielo ntae lalachera o nkanachera oaacham ꞉Nkai, nchere ketegelua ninye ntae.

⁵ Naa mara ake te rerei eotuo Lomon Supati lang nitii ntae, kake to ngolon o ta Ltau Sinyati o sipunoto nabore ajo kedede. Iyielolo sii netiu apa lwuenet lang kiwueni tenebo o ntae. Ikitowuana apa aiko nejia tankaraki ntae.

⁶ Naa itang'asutua apa ntae aairukurukore te nkichon inchi nkoitiei ang o ne Laitoriani. Amu kore abaki iatata sina kitok, naa itang'amaitie rerei te ng'ida naing'uaa Ltau Sinyati,

⁷ niakuku ntae nkitanyanyukoto supat taa lairukok le Yeso Kristo pooki ootii mbat e Makedonia o lootii atua mbat e Akayia.

⁸ Amu kore rerei la Laitoriani, naa ketining'ie eing'uaa ntae, naa mara ake taa mbat e Makedonia o ne Akayia etining'ie, kake ketabayie nkurukoto inchi taatua Nkai ng'oji pooki, metaa meatae abaki mbae nayiere nikintoki iyioo aaponiki.

⁹ Amu kore lolo tung'ana, naa keimakita ninkuna payie ing'amaa iyioo o ninkuna tinimbelekenyakinono Nkai, ning'uaa nkaitok e sapare, payie itumtum aaisiaayia inia Ai naichu nedede,

¹⁰ niwuenini aanyu Nkerai enye naing'uaa chumata, ilo oitipiwua ꞉ninye too lootuata, Yeso olaku iyioo te inia goro nalotu e Nkai.