1 Lkorinto 8 - Samburu

Mbaa naaipirita ndaa naitakaki nkaitok e sapare

¹ Kore taa mbaa naaipirita ndaa naitakaki nkaitok e sapare naa kesipa nchere, ikiyelo pooki sipata e ana bae. Kore ng'eno naa keilachie ltung'ani, kake kore nchaman neitogol lkulie.

² Kore ilo ojo keing'en, naa ewuon ake meyielo inia sipata naichiaakino payie eata.

³ Kake kore ltung'ani oacham Nkai naa ilo tung'ani eyielo ꞉Nkai.

⁴ Naaku kore ta mbae naipirita ndaa naitakaki nkaitok e sapare, ikiyiolo ajo kore nkaitok e sapare tana kop naa meitoki, amu nabo ake Nkai nadede.

⁵ Kore abaki eatae nenia tokitin naajo ltung'ana nkaitok enche, oaa te chumata anaa to nkop, naa kedede taa, keatae nkaitok o laitoriak kumo le sapare.

⁶ Kake nabo ake Nkai nikiata iyioo, Papa laa ninye eing'uaa ntokitin pooki naaitibiraki, naa ikitii ana kop payie kitum kenya aachom netii ninye. Neatae sii Laitoriani obo Yeso Kristo, laa aimu ninye eitibira Nkai ntokitin pooki naa aimu ninye eatae iyioo.

⁷ Kake mara pooki ooyielo ana sipata. Ketii ltung'ana ootomoo esai apa nkaitok e sapare, naaku ewuon eya inia daa nanyaita ana ndaa naitakaki nkaitok e sapare, neitanyamal ꞉inia ltauja lenche oaachal.

⁸ Kore ndaa naa meitinyikaki iyioo Nkai, naa tinimikinya meatae ntoki nang'oriki iyioo, naa kore sii tinikinya, meitoki naponikino iyioo.

⁹ Errita naa ate oleng payie meaku ake ꞉inia lakunoto inchi ninyiayieyie ndaa naitarruo lolo oaachal to nkurukoto.

¹⁰ Amu tenedol ltung'ani oachal to nkurukoto ajo inyaita ndaa ta nkaji e inia ai e sapare, meicho naa inia ninye metama ndaa naitakaki nkaitok e sapare?

¹¹ Naaku kore ilo tung'ani oachal oatanang'a sii ninye ꞉Kristo, neidaaya tankaraki inia sipata niyielo!

¹² Kore tiniaas ng'oki aitarroki lalachera o nkanachera inono naachal to nkurukoto, nintanyamal ltauja lenche, naaku itaasa ng'oki aitarroki Kristo.

¹³ Naaku kore tanaa ntoki nanya naitanyamal lalache tanaa nkanache ai, maigil aikata anya nkiri, payie maitopong'oo hoo ltung'ani obo oiruko Nkai.