1 Lkorinto 6 - Samburu

Entining'oto ta nkanisa eitu iyaroro nkiguana e nkop

¹ Kore tanaa keatae lobo linchi oatayie likae mbae, emincho hoo eya tekue lolo tung'ana lamara loosipat meeiguanare. Keyiere niyaya tekue sinyat le Nkai.

² Miyielolo aajo keiguanare ꞉sinyat le Nkai nkop? Naa amaa tanaa inguanarere kenya nkop, mara indimdim aaiguanare mbaa kunini taata?

³ Aa miyielolo ntae aajo inguanarere abaki lmalaikani? Naa amaa tana inguanarere kenya lmalaikani, aijoijo kuna baa kunini e taata mindimdim!

⁴ Naaku amaa tanaa ketii atua ntae mbaa niworrorro, aanyo payie inchocho lkulie ltung'ana lemeata rrepeta ta nkanisa meiguanare ntae nedung'oki nkiguana?

⁵ Kajoito taa nchi payie enya ntae anyit. Aijo meatae hoo ltung'ani ng'en taatua ntae oidim aiguanare lalachera o nkanachera naata larrabal, nedung'oki nkiguana?

⁶ Eji naaku keya le Kristo lalache tanaa nkanache enye meiguanareki abaki tekue lolo lamara le Kristo!

⁷ Kore tanaa iyaroro nkiguanaitin meiguanareki ntae, naaku keitodolu inia ajo iterriaate. Aanyo payie minchocho ake meitarruokini ntae? Aanyo payie minchocho ake metasapari ntokitin inchi?

⁸ Kore niasitata naa intarruokitata, nintamaitata abaki lalachera o nkanachera inchi!

⁹ Aa miyielolo ntae aajo metum ltorrok nkitoria e Nkai? Emincho esapi ntae amu kore lolo oaas mboita e sesen nemeichiaakino tanaa loasai nkaitok e sapare tanaa loaas loloito tanaa lewa ooboitiere lewa te sesen,

¹⁰ tanaa loopurrucho tanaa loolubo tanaa lamerak tanaa loodekicho tanaa loaasapaa ntokitin ee ltung'ana naa metum nkitoria e Nkai.

¹¹ Nejia apake etiu lbata linchi kake keitukoyieki ntae ng'ok, neitisinyaki ntae, neitaaki iyioo loosipat ta nkarna e Laitoriani Yeso Kristo o ta Ltau le Nkai ang.

Eyanyita Nkai tee seseni linchi

¹² Keidim lbata lang nejo, <> Kake kore etiu nejia, mara ntoki pooki naas naaret. Kore abaki tanaa keji meitoki naaibooyo payie maas ntoki nayieu, kake Meyiere paaicho ntoki maaitoria.

¹³ Neidim lbata nejo, <> Kake kore etiu nejia, keidakie Nkai pukura mparri nabo. Kore sesen naa mara payie easieki mboita e sesen nemeichiaakino, kake payie eyanyitieki Laitoriani laa ninye lopeny seseni lang.

¹⁴ Keitipiwua ꞉Nkai ninye aaitung'aa lootuata naa keitipiu sii iyioo to ngolon enye.

¹⁵ Amaa, miyielolo aajo kore seseni linchi naa rubat e sesen le Kristo? Keichiaakino sa tanaya rubat e sesen le Kristo naitaa rubat e milayoi? Nakaiting'o, meichiaakino!

¹⁶ Ana miyielolo aajo kore loboitare milayoi te sesen, neaku pukura sesen obo? Amu keigero ajo, <>

¹⁷ Kake kore ltung'ani oibung'are Laitoriani neaku ntoki nabo o ninye ta Ltau Sinyati.

¹⁸ Entalam mboita e sesen nemeichiaakino! Kore pooki oas inia neitarruo ꞉inia ng'oki sesen lenye alang nkae ng'oki pooki.

¹⁹ Amaa, miyielolo aajo kore sesen linchi naa nkaji namanya ilo Ltau Sinyati oichoo ntae Nkai, naa miyielolo aajo irara le likae?

²⁰ Keitama ntae Nkai ntoki nagol nemenyieng'unoi, naaku eyanyita ninye tee sesen linchi.