1 Lkorinto 3 - Samburu

Oro taatua nchula ee ltung'ana ooiruko Kristo to Korinto

¹ Kore sii apa nanu lalachera o nkanachera ainien, mairorie ntae ana ltung'ana ooirukurukore Ltau le Nkai, kake kairorie ntae ana ltung'ana ooirukurukore mpukunoto enche torno, nairorie ana nkera kunini neitu ebulu taatua Kristo.

² Kaichoo nanu ntae kule, mara ndaa nagol, amu midupdup aatam ndaa nagol. Newuon sii ake taata miduputata,

³ tankaraki ewuon ake irukurukorere mpukunoto inchi torno. Amaa tanaa ewuon iatata lom o nchankar taatua ntae, meitodolu inia ajo ewuon eitore ntae mpukunoto inchi torno?

⁴ Amaa tenejo likae, <> nejo likae, <> mitiuwuanana ake ana netiu chiaake ltung'ana le nkop?

⁵ Nyo dei Apolos? Naa nyo Paulo? Ikira ake iyioo laisiaayiak oaatasichiere Nkai payie irukuruk ntae. Meatae tee iyioo lamara ilo siaai ake otegelaka ꞉Laitoriani easita.

⁶ Katuuno nanu taatua ntae rerei le Nkai, nebukoki Apolos nkurukoto inchi nkare, kake Nkai naitubulua inia kurukoto.

⁷ Naaku mara ilo oun namara sii ilo obukoki nkare oara le tipat, kake inia naitubulu nara netipat, naa Nkai inia.

⁸ Kore ilo oun lantararai o ilo obukoki nkare naa kerisio tipat enche, nemeata lemelak ꞉Nkai te nkiririkinoto e siaai lenye oataasa.

⁹ Amu laisiaayiak le Nkai oaasicho tenebo kira iyioo, nirara ntae lchampa lenye o nkaji natecheta ninye.

¹⁰ Kore te nkiririkinoto e munyani naaichoo Nkai, naitamanyu lkitamanyunoto ana lachetani arriyia, nechetaa likae to ng'oji naitabaka nanu. Kake keichiaakino payie eing'or ltung'ani pooki neikunaa nchatata,

¹¹ amu meatae likae kitamanyunoto ooidim ltung'ani aitamanyu mara ake ilo otipikaki, naa Yeso Kristo taa ilo.

¹² Oo echetu ltung'ani nkaji enye te nkeper e ilo kitamanyunoto ta saabu tanaa to nkochelai tanaa too soito oogol nkinyang'a tanaa tee nkeek tanaa too nkujit tanaa tee mbene,

¹³ keliooi kenya netiu siaai le pooki ng'ae. Amu kore kenya, keibalunyie inia ꞉parri e nkiguana ilo siaai te nkima, teneimieki siaai oataasa pooki ng'ae inia kima.

¹⁴ Kore tenebik inia aji natecheta ninye eimieki nkima, naa ketum laata.

¹⁵ Kake kore tenenya nkima siaai lo ltung'ani, nelo pus, kake keitejeuni ninye ana ake ltung'ani otowuapuaki taatua nkima.

¹⁶ Amaa, miyielolo aajo irara ntae nkaji e Nkai naa atua ntae emanya Ltau le Nkai?

¹⁷ Teneitarruo ltung'ani nkaji e Nkai, near ninye ꞉Nkai. Amu kore nkaji e Nkai naa keisinyati, naa ntae inia aji.

¹⁸ Emisap ate! Kore tenetii lobo linchi ojo keing'en tana kop, oi eng'as aaku lmadai payie etum ng'eno nadede.

¹⁹ Amu kore inia najo ltung'ana ng'eno tana kop naa madai ta Nkai. Ana nejo Lkigerot Sinyat nchere, <>

²⁰ Neitoki ajo ta nkae ng'oji, <>

²¹ Naaku emincho hoo ltung'ani eng'idare likae tung'ani, amu kore ntokitin pooki naa nkuninchi.

²² Linchi Paulo o Apolos o Kepa, naa ninchi nkop o nkichon o lkiye, taata o kenya. Meatae ntoki namara ninchi,

²³ kake kore ntae naa irara le Kristo nera ninye le Nkai.