1 Lkorinto 16 - Samburu

Eiturrurroki ropiyiani aaret sinyat

¹ Kore taa mbaa naaipirita nkuturrurroto ee ropiyiani tankaraki ltung'ana sinyat ootii Yerusalem, kayieu niasias ana natiaaka nkanisani ee Lgalatia.

² Kore ta mparri e Jumapili, kayieu neiwuang'ie ltung'ani pooki aiteng'el nkuti ropiyiani te risioroto ee ropiyiani naatang'amayie, paa kore tanabau naaku indipa aaiturrurru nenia ropiyiani.

³ Kore sii tanabau naa kaitanap lolo tung'ana meewaita Yerusalem nenia kichoorot o mpala naaimaki nenia ropiyiani.

⁴ Kore tanaa keyiere payie alo sii nanu, naairukurukore ꞉ninche.

Rreten e Paulo payie eisabaki nkopi

⁵ Kore tanaidip achomo Makedonia nalotu nitii, amu kayieu nang'as aimaa inie.

⁶ Naa tanaa keidimai, kabik tenebo o ntae peneu tanaa sii inia ng'amata pooki e nkirobi, nikiretutu taa machomo aisabaki ng'oji ake pooki nayieu nalo.

⁷ Mayieu nalotu adol ntae asara, kayieu naya nkata naado tenebo o ntae tanaa kaaicho Laitoriani mpaach.

⁸ Kake kang'as awuon tele kerenket le Epeso ana metabau nkata e Pentekost.

⁹ Amu keatae mpaach tene naasieki siaai sapuk la Laitoriani, netii sii ltung'ana kumo laaibooyo nanu.

¹⁰ Kore tenelotu Timoti nitii, enchoo metaa kewuon taatua ntae meata ntoki naurie, amu Laitoriani sii eisiaaita ꞉ninye ana nanu.

¹¹ Emincho hoo ltung'ani emenaa ninye, kake enteretu ninye mechomo kue to lototo enye te seriani, payie errinyunyie alotu natii. Amu kaanyuta ninye tenebo o lkulie alachera.

¹² Kore aitoki naipirita lalache lang Apolos, katonyua arreten ninye meeu nitii tenebo o lkulie alachera, kake kesip apa ninye ajo mara taata nkata naichiaakino payie eisabaki ntae. Kelotu naa ake adol ntae tenetum mpaach.

Lomon o nkirorokino naidipie

¹³ Entirripicho nintachoo oleng to nkurukoto! Entaa ltung'ana ooirich negol!

¹⁴ Entaas siaai linchi pooki te nchaman.

¹⁵ Iyielolo naa aajo kore Sitepanas o nkang enye, naa ninche apa ltung'ana lekue ooibelekenyete aairuk Laitoriani to nkop e Akayia, neitaitua ate tankaraki nkisiaayiare ee ltung'ana le Nkai. Kalej naa ntae lalachera o nkanachera ainien,

¹⁶ entodoi ate taabori rikore ee ltung'ana ootuwuana lolo, o lkulie sii ooisiaaicho tenebo o ninche.

¹⁷ Kating'ide oleng payie epuonu Sitepanas o Portunato o Akaiko, amu kore aata ninche tene netuwuana ntae aata.

¹⁸ Kaaitogolito ꞉ninche, ana naitogolito sii ꞉ninche ntae. Keichiaakino ltung'ana ootuwuana lolo rrepeta.

¹⁹ Keiroroki ntae nkanisani pooki naatii ana luboto e Asia. Kore sii Akuila o Pirisila tenebo o nkanisa natumo ta nkaji enche, keiroroki ntae oleng taatua Laitoriani.

²⁰ Keiroroki sii ntae lalachera pooki ootii ene. Erorokinoto to ngusoto e nchaman.

²¹ Kore ana kirorokino naa nanu Paulo oigero ta nkaina ai makoon.

²² Kore ltung'ani pooki lemecham Laitoriani, enchoo eaku lodiaa! Laitoriani lang, wou!

²³ Metaa munyani e Laitoriani Yeso tenebo o ntae.

²⁴ Metaa nchaman ai tenebo o ntae taatua Kristo Yeso.