1 Lkorinto 14 - Samburu

Nkitaarriyiana naipirita naaduo kichoorot naaicharu Ltau Sinyati

¹ Entonyok oleng eng'oru nchaman. Kake enchoo metaa iatata yieuna ee nkichoorot e Ltau Sinyati, naleng nkichooroto e naibon.

² Kore ltung'ani pooki oiro too nkutukie naaidimie Ltau Sinyati, naa mara ltung'ana eirorie kake Nkai. Meitoki nayielo nejo amu keiro ninye mbaa naaisudoro to ngolon e Ltau Sinyati.

³ Kake kore lolo ooitai naibon e Nkai naa ltung'ana eirorie aaitogol, nerreten, neilejilej.

⁴ Kore lolo ooiro too nkutukie naaidimie Ltau Sinyati, naa ate eitogol, kake kore lolo ooitai naibon e Nkai naa nkanisa eitogol.

⁵ Kore naa taata, kayieu niroro pooki too nkutukie naaidimie ꞉Ltau Sinyati, kake kore nayieu oleng naa payie imbonichocho pooki. Amu kore naibon e Nkai naa ninye naata tipat alang nkiroroto ee nkutukie naaidimie ꞉Ltau Sinyati, peechu naa keatae ltung'ani olimu aibalunyie payie eitogoli nkanisa.

⁶ Amaa taa lalachera o nkanachera ainien, nyo eret ntae tanalotu nitii nairo to nkutuk naaidimie ꞉Ltau Sinyati namaliki ntae najoito? Meret hoo ntae. Kake kore naret ntae naa tanayaki ntae mbolunoto naing'uaa Nkai tanaa yielounoto ee mbaa e Nkai tanaa naibon tanaa sii nkiteng'ena.

⁷ Amaa tanaa ltoilo obo ake eitai masaa nemeichu e ranyare naatuwuana ndule anaa nkinanta, aji inko tinintapaach ltoilochi ooiru?

⁸ Oo ta larrabal tenekut ltung'ani mowuo nemeyieloi aajo tankaraki nyo, nemening'o ltoilo lenye, ng'ae orretena alo anya larrabal?

⁹ Nejia sii ake etiu tiniroro too nkutukie naaidimie ꞉Ltau Sinyati, kaji eiko ltung'ani teneyielou inia nijeitoto? Ituwuana ake ltung'ani oimie nkutuk enye siu.

¹⁰ Keatae nkutukie kumo oleng to nkop, nemetii hoo nabo nemeibala nkiroroto.

¹¹ Kake tanamayielo nkutuk nairorita likae tung'ani, netuwuana ninye lo lorere leiching'a ta nanu, natuwuana sii nanu le likae orere te ninye.

¹² Kore naa amu iatata yieuna payie itumtum nenia kichoorot naichoru Ltau Sinyati, entonyok naa eng'oru niasicherere oleng nenia kichoorot naaitogol nkanisa.

¹³ Naaku kore ltung'ani oiro too nkutukie naaidimie ꞉Ltau Sinyati, keyiere naa neomon Nkai meichoo nkidimata naibalunyie inia najoito.

¹⁴ Amu kore tanaomon too nkutukie naaidimie ꞉Ltau Sinyati, naaku Ltau Sinyati ake apeny laarikorita kake metii mparrunot ainien inie.

¹⁵ Naaku kaa sa aas? Kaicho Ltau Sinyati maatirikoi to nkomono, naomon sii taa mparrunot ainien. Naicho maatirikoi ta ranyare, narany sii taa mparrunot ainien.

¹⁶ Amaa tinincho Nkai nache iomonito to nkutuk nikindimie ꞉Ltau Sinyati, kaji eiko ltung'ana omon ootuo atua ntumo tenejo <> to nkomono ino e nache? Meata, amu meatae neiko teneyielou nijoito.

¹⁷ Keisupat oleng inia omono ino e nache, kake meatae ltung'ani oitogol ꞉inia.

¹⁸ Kaicho Nkai nache amu kairo to nkutuk naaidimie ꞉Ltau Sinyati alang ntae pooki.

¹⁹ Kake kore to ntumo e nkanisa, naikach tanairo rereii imiet ooning'unoi, payie aiteng'en lkulikae, alang tanairo rereii 10,000 to nkutuk naidimie ꞉Ltau Sinyati.

²⁰ Lalachera o nkanachera ainien, emiparricho ana nkera kunini taa mbaa naaipirita Nkai, kake entewueni ana nkera nemeitoki eyielo taa mbaa naaipirita ntorroni, niparrichocho ana ltung'ana kutuaa taa mbaa e Nkai.

²¹ Amu kejo Laitoriani too Lkigerot Sinyat nchere, <>

²² Naaku naa kore nkiroroto ee nkutukie nemening'unoi naa nkitodolunoto too ltung'ana leitu eiruk Kristo, namara too lolo ooiruko Kristo. Kake kore nkichooroto e naibon e Nkai naa nkitodolunoto too looiruko Kristo, namara too lolo leitu eiruk Kristo.

²³ Amaa tenetumo ltung'ana pooki ta nkanisa, neng'asu pooki aairo too nkutukie naaidimie ꞉Ltau Sinyati, nejing'u ltung'ani omoni anaa leitu eiruk Kristo atua ntae, mara kejo ninye itamadete?

²⁴ Kake kore tanaa imbonichocho pooki te inia kata nalotu ltung'ani leitu eiruk Kristo tanaa lomon atua ntae, nesipu koon ajo kera loo ng'ok te inia naning'ito, neiguanare ninye ꞉inia pooki naning,

²⁵ neibalieki mbaa naaisudoro e ltau lenye. Naa keirrigo asai Nkai ejo, <>

Nkoitiei naichiaakino tenesaii Nkai

²⁶ Nyo dei ajoito, lalachera o nkanachera ainien? Kore tinitumomo aasai Nkai, enchoo metaa keata lobo linchi sinkolio neata likae nkiteng'ena neata likae mbaa naaibalakinyie ꞉Nkai. Ninchocho meiroro likae nkutuk naidimie ꞉Ltau Sinyati, nelimu likae nejo inia kutuk naidimie ꞉Ltau Sinyati. Entaas inia pooki payie eitogoli nkanisa.

²⁷ Kore tanaa keiro ltung'ani to nkutuk naidimie ꞉Ltau Sinyati, enchoo ltung'ana oare nemerepaa okuni eiro eijiparo, neatae likae oibalunyie nejoito ninche.

²⁸ Kake tanaa meatae ltung'ani olimu aibalunyie inia najoitoi, entigirata naa ta nkanisa neirorie ake ꞉ltung'ani makoon Nkai.

²⁹ Enchoo loibonok le Nkai oare anaa okuni ooichooki lkilikuai oing'uaa Nkai eibonicho, kore lkulie tung'ana pooki nesipu nejoitoi.

³⁰ Kake kore tenetum ltung'ani owuon to ntumo lkilikuai oing'uaa Nkai, negira ilo duo oirorita aicho ilo otumo lkilikuai mpaach meiroro.

³¹ Iatata pooki mpaach nimbonichiere, kake embonicho ma obo obo payie itumtum nkiteng'ena neitogoli ltauja le pooki ng'ae.

³² Kore ilo oasichere nkichooroto e naibon e Nkai naa keitore ꞉ninye inia kichooroto,

³³ amu kore Nkai naa mara ne ng'olng'ol kake Nkai e seriani. Kore naichiaakino taa nkanisani pooki ee sinyat,

³⁴ naa payie egira ntomonok. Amu meyiere payie eiro, kake payie eitodoyio ate ana naigero tee nkitanapat e Nkai.

³⁵ Kore tanaa keatae ntoki nayieu neyielou, neipar lpayiani lenche ta nkang. Amu anyit teneiro ntomononi ta nkanisa.

³⁶ Amaa, ntae dei apa eing'uaa rerei le Nkai? Oo aitoki, ntae apa aapeny etabaka?

³⁷ Kore ltung'ani pooki ojo kera loiboni le Nkai tanaa loata nkichooroto e Ltau Sinyati, enchoo eyielou ajo kore inia naigerokita ntae naa nkitanapata e Laitoriani.

³⁸ Kake kore ltung'ani pooki lemechilu ana, naaku mechiluni abaki ninye.

³⁹ Naaku taa lalachera o nkanachera ainien, entum yieuna nimbonichierere, nimimitmit eirori too nkutukie naaidimie ꞉Ltau Sinyati,

⁴⁰ kake entaas ntoki pooki aaiririki o to nkoitiei naichiaakino.