1 Lkorinto 13 - Samburu

Nchaman

¹ Kore tanaa kairo nkutukie naairo ltung'ana o naairo lmalaikani namaata nchaman, naaku nchi atuwuana senkei nairu tanaa ltuala oiru.

² Kore tanaa kaata nkichooroto e naibon e Nkai, tanaa aata yielounoto o ning'unoto ee mbaa naisudoro e Nkai o tanaata nkurukoto sapuk ta Nkai naiwuotie lowuan, namacham ltung'ana, naaku meitoki ara.

³ Kaidim sii aichooi ntoki pooki naata, naichooyo abaki sesen lai metepeji, kake kore tanaa maata nchaman naaku maaret inia.

⁴ Kore nchaman naa keng'iri, neata lng'er, nemeata lom, nemeikar, nemeilach.

⁵ Measicho to nkoitiei nemeata nkanyit, nemepiak tanaa esioki agoro, nemenap ntorrok e apa.

⁶ Meng'idakino ꞉nchaman ntorrok, kake sipat eng'idakino.

⁷ Meitisia nchaman taa mbaa pooki, neata nkurukoto o siligi taa mbaa pooki, neng'iri nkata pooki.

⁸ Meiting aikata nchaman. Kore naibon e Nkai naa keiting, neiting nkutukie naaidimie ꞉Ltau Sinyati meirori, neiting sii yielounoto.

⁹ Amu mikiyielo aaichu mbaa pooki, nimikimbonu sii mbaa pooki.

¹⁰ Kake kore teneibalunyieki mbaa pooki e Nkai, naaku meng'or aitoki yielounoto o naibon ang.

¹¹ Kore apa ara nkerai nairo ana nkerai, naparricho ana nkerai, nadol mbaa ana nkerai, kake kore taata ataa ltung'ani kitok, maitoki aas ntokitin e keraicho.

¹² Kore taata mbaa pooki naaipirita Nkai, naa ikidol eirupurup atuwuana nkomom te kitaap, kake ikidol kenya ninye nkomom. Mayielo taata ntoki pooki, kake kayielou kenya pooki ana naayielo nanu ꞉Nkai katukul.

¹³ Naaku taa kebik kuna uni, nkurukoto o siligi o nchaman. Naa kore nalang pooki naa nchaman.