1 Lkorinto 12 - Samburu

Nkichoorot naaicharu Ltau Sinyati

¹ Lalachera o nkanachera ainien, kore taa mbaa naaipirita nkichoorot naaicharu Ltau Sinyati, mayieu naaku meitoki iyielolo.

² Amu kore apa ewuon eitu iyielouu Laitoriani, ketitila neyiataa ntae nkaitok e sapare nemeidim aairoro entasai ninche.

³ Naaku kayieu niyielou nchere meatae ltung'ani outaa ꞉Ltau le Nkai ojo, <> nemeatae sii lojo, <> mara to ngolon e ilo ꞉Ltau Sinyati le Nkai.

⁴ Keatae nkichoorot naaicharu Ltau Sinyati napaapaacha, kake lobo ake ninye.

⁵ Neatae nkoitieii naapaapaacha naaisiayieki Laitoriani, kake lobo ake ninye.

⁶ Neatae nkoitieii naapaapaacha naasie Nkai siaai, kake inia Ai nabo ake naas nenia pooki taatua iyioo pooki.

⁷ Meatae lemeicho ꞉Nkai Ltau Sinyati metelioi to nkoitiei naidim ateretie pooki.

⁸ Ltau le Nkai oicho ltung'ani obo nkidimata nairorie lkilikuai obore ng'eno e Nkai, naa ilo Tau siake oicho aitoki likae tung'ani nkidimata nayielounyie baa, neiro naaipirita nenia baa.

⁹ Kore likae neicho ꞉Ltau Sinyati nkurukoto sapuk, naa ilo Tau siake oicho aitoki likae ngolon naichiunyie ltung'ana.

¹⁰ Neicho likae nkidimata naasie ne nking'asia, kore likae neicho nkichooroto e naibon, neicho likae nkidimata naorie Ltau Sinyati o lairiruani, neicho likae nkidimata nairorie too nkulie kutukie naaidimie ninye, neicho likae nkidimata nalimunyie nejo nenia kutukie.

¹¹ Kake Ltau Sinyati obo ake oaas inia pooki, aicho ltung'ana nkichoorot ana nayieu ninye.

Ikira pooki sesen obo le Kristo

¹² Ntacho maichoo ntae nkitanyanyukoto, nchere kore ana naata sesen obo lo ltung'ani rubat kumo nera nenia rubat sesen obo, nejia sii etiu Kristo.

¹³ Amu kore iyioo pooki, oo duaake kira loo Lyiaudi tanaa loo lkulie oreren tanaa rrindiki tanaa lamara rrindiki, keipatisaki iyioo pooki payie kiaku ilo sesen obo ta Ltau Sinyati, netubukokaki iyioo pooki ilo Tau Sinyati.

¹⁴ Amu kore sesen naa mara rubata nabo eata kake rubat kumo.

¹⁵ Amaa tenejo nkeju, <> amaa tenejo nejia, keidimai sa metaa mara rubata e sesen?

¹⁶ Naa kore tenejo nkiyok, <> amaa tenejo nejia, keidimai sa metaa mara rubata e sesen?

¹⁷ Amaa duaake tanaa kore nkong'u naaku ninye sesen pooki, aji ening'ichiereki? Oo tanaa nkiyok sesen pooki, aji eing'uaichiereki?

¹⁸ Kore natiu, meata rubat neitu epik Nkai mpaach enche te sesen ana nayieu ninye.

¹⁹ Amaa tanaa rubata nabo ake sesen, naaku aji naa etii sesen?

²⁰ Kore natiu, keatae rubat kumo kake lobo ake sesen.

²¹ Naaku meidim nkong'u atiaaki nkaina, <> nemeidim sii ꞉nkue atiaaki nkejek, <>

²² Kore alang inia, naa nchere kore rubat e sesen naatuwuana kechal naa netipat oleng,

²³ naa kore rubat e sesen nikidol etuwuana mara ne nkanyit, naaku ninche eichori nkanyit oleng. Naa kore rubat naaidim neaku anyit tenedoli, neramati ta nkanyit kitok,

²⁴ kake meisudori rubat namara anyit teneing'ori. Kake ketipika Nkai rubat e sesen tenebo payie eaku kore nenia rubat naatuwuana mara ne nkanyit neaku ne nkanyit,

²⁵ payie meatae oro taatua sesen, kake payie eatae naboicho, eretuno rubat pooki.

²⁶ Kore tenemei rubata nabo e sesen, nemei rubat pooki tenebo o inia, kore payie etum rubata nabo rrepet, neng'ida rubat pooki.

²⁷ Kore ntae pooki naa sesen le Kristo irara, nemeatae linchi lamara rubata enye.

²⁸ Kore ta nkanisa enye, naa ketegelua Nkai ltung'ana lbata metaa, kore lekue naa lkipaareta le Yeso, kore le oare naa loibonok le Nkai, kore le okuni naa laiteng'enak le nkanisa, neitoki agelu lkulie metaa loaata ngolon naasie mbaa e nking'asia, o loaata ngolon naichiunyie ltamoyia, o loaata nkidimata naretichiere, o loaata nkichoorot e rikore o loiro too nkulie kutukie.

²⁹ Kore naa, mara ltung'ana pooki oara lkipaareta le Yeso, namara pooki oara loibonok le Nkai, namara pooki oara laiteng'enak le nkanisa, namara pooki oata nkidimata naasie ne nking'asia,

³⁰ tanaa ngolon naichiunyie ltamoyia, namara sii pooki ooiro too nkulie kutukie naaidimie Ltau Sinyati, namara pooki ng'ae oidim aibalunyie nejo nenia kutukie.

³¹ Entonyok enteyiai nenia kichoorot e Ltau Sinyati naata tipat oleng. Naa kore taata kaitodol ntae nkoitiei nalus too pooki.