1 Lkorinto 11 - Samburu

¹ Entoduaayieki ana payie aduaaya nanu Kristo.

Naichiaakino niasias tinitumomo aasai Nkai

² Kaichoo ntae rrepet tankaraki nikiparrurru chiaake, nimbung'utata inia kiteng'ena ana naitarasaka apa ntae.

³ Kake kayieu payie iyielouu aajo Kristo nkue e lpayian pooki, naa lpayian nkue e ntomononi enye, naa Nkai nkue e Kristo.

⁴ Naaku kore lpayian pooki oamonito Nkai neibonicho tenetumore ltung'ana le Nkai eisiapa nkue, naaku meyanyit Kristo.

⁵ Naa kore ntomononi naomonito Nkai, neibonicho meisiapa nkue naaku meyanyit lpayian lenye amu nchi etuwuana ntomononi nabarna nkue.

⁶ Kore tenemeisiap ntomononi nkue enye, neroyie abarn nkue, kake tanaa anyit inia, nchoo eisiap nkue enye.

⁷ Meichiaakino payie eisiap lpayian nkue teneomon tanaa teneibonicho, amu keitayia Nkai ninye metutuwuana ana ninye neyaki Nkai nkanyit, neitayiaki ntomononi payie eyaki lpayian lenye nkanyit.

⁸ Amu eitu apa eitibirunyie ꞉Nkai lpayian ntomononi, kake lpayian eitibirunyie ntomononi.

⁹ Namara sii lpayian eitibira ꞉Nkai tankaraki ntomononi, kake ntomononi eitibira tankaraki lpayian.

¹⁰ Naaku inia payie eichiaakino neichop ntomononi ntoki naisiapaa nkue enye naitodolu ajo ketii taabori nkitoria e lpayian lenye o tankaraki lmalaikani.

¹¹ Kore siake etiu nejia, kore taatua Laitoriani, keyieu ntomononi reto e lpayian, neyieu sii lpayian reto e ntomononi.

¹² Amu kore ana naitibirunyie ꞉Nkai ntomononi ekue lpayian, nejia siake etiu taata, nchere meatae lpayian leitu eiu ꞉ntomononi. Kake kore ntoki pooki naa Nkai eing'uaa.

¹³ Entetem ntae ana maate. Amaa, keichiaakino teneomon ꞉ntomononi Nkai meisiapa nkue?

¹⁴ Amaa chiaake tinidol lpayian oaata lpapit oodoo eomon Nkai, mara anyit?

¹⁵ Naa kore teneodoo ntomononi lpapit neaku sikar, amu Nkai naichoo ninye lpapit oodoo meisiapie nkue enye.

¹⁶ Kake teneatae ltung'ani oata nchankar, naaku mikiata likae kerreti tana mbae, nemeatae sii taa nkanisani e Nkai pooki.

Entam ndaa e Laitoriani to nkoitiei naichiaakino

¹⁷ Kore taata kaitaarriyian ntae, naa marrep ntae amu kore ntumo inchi naa kear ntae alang neret.

¹⁸ Kore nekue, kaatilikaki nchere kore chiaake tinipuonunu aatumo ana nkanisa, iatata oro naa kairuko eitu.

¹⁹ Meata nchere payie meatae lturrurri taatua ntae amu te inia ake elioi ajo ng'ae etachamayieki.

²⁰ Kore tinitumomo tenebo, minyanya ndaa e Laitoriani to nkoitiei naichiaakino.

²¹ Amu kore ewuon eng'or nkata, meata lemesar anya ndaa enye, naaku keata lobo sumach netemere likae.

²² Haij! Amaa taa nkang'itie nchi miatata ng'oji nidaarere o nimaticherere? Imenmen lturrur loo ltung'ana le Nkai, nintamtam anyit lolo lemeitoki eata? Kaa sa ajoki ntae? Karrep ntae? Kesipa marrep hoo ntae tana bae.

²³ Kore inia natang'amayie ta Laitoriani naa ninye aitarasaka ntae, nchere kore Laitoriani Yeso te inia kuarie natilikorieki, nerrapu mukate

²⁴ neicho Nkai nache. Negil nejo, <>

²⁵ Kore payie eidip aatam ndaa, nerrapu lkikompe nejo, <>

²⁶ Amu kore nkata pooki ninyanya inia mukate, nimatmat ilo kikompe naa sipata e lkiye la Laitoriani ilikoo aaibalie ana metuchukunyie.

²⁷ Naaku kore pooki oanya inia mukate nemat ilo kikompe to nkoitiei nemeichiaakino naaku keitarroka sesen o lodo la Laitoriani.

²⁸ Keichiaakino naa paa kore ltung'ani pooki neng'as asipu ltau lenye ewuon eitu enya mukate, nemat ilo kikompe.

²⁹ Amu kore tininyianya mukate nimatmat ilo kikompe miparraa aajo sesen la Laitoriani, naaku inyanya, nimatmat too nkoitiei naayaki ntae nkiguana e Nkai.

³⁰ Naa tankaraki inia payie etii atua ntae lkumo oomoyiaa o loaachal, nemeikuni abaki looteperio.

³¹ Kake kore tinikinguanare ate naaku meiguanareki iyioo.

³² Kore teneiguanare iyioo Laitoriani, naa keiteme iyioo payie medung'okini iyioo nkiguana kenya tenebo o nkop.

³³ Naaku taa lalachera o nkanachera ainien, kore tinitumomo tenebo aanya ndaa e Laitoriani, entaanyunoto.

³⁴ Naa kore tanaa keatae lobo linchi oata sumach, nchoo enya ndaa ta nkang enye payie mipikpik ate atua nkiguana e Nkai tinitumomo tenebo. Kore nkulie baa naa kaitaarriyian kenya ntae tanalotu nitii.