1 Lkorinto 1 - Samburu

¹ Kore ana palai naa keing'uaa Paulo oipoto ꞉Nkai ana nayieu ninye metaa lkipaaret le Yeso Kristo, neing'uaa sii lalache lang Sositenes.

² Ikiroroki nkanisa e Nkai natii lkerenket le Korinto, lolo ooitaa ꞉Nkai metaa ltung'ana lenyena etii atua Laitejeunoni Yeso, neipoto metaa sinyat tenebo o lolo pooki ooipot nkarna e Laitoriani lang Yeso Kristo to ng'oji netii, ilo Aitoriani lenche naa lalang.

³ Meichoo ntae Nkai Papa lang o Laitoriani Yeso Kristo munyani o sotua.

Etamayiana iyioo Nkai kitii atua Yeso Kristo

⁴ Kaicho chiaake Nkai ai nache tankaraki ntae amu keichoo ninye ntae munyani itii atua Kristo Yeso.

⁵ Kore itii atua ninye neitiemua ntae Nkai to ntoki pooki, aaku arriyiak, niakuku ng'eni,

⁶ tankaraki sipata nikitilimutua naipirita Kristo, naitodolua Nkai taatua ntae ajo kedede.

⁷ Naaku milauu hoo nkichooroto nabo naicho ntae Ltau Sinyati ianyutata meibalunyieki Laitoriani lang Yeso Kristo tenechukunye kenya.

⁸ Keitogol sii ninye ntae entachoto katukul to nkurukoto metabaki nkiting'oto, payie iakuku ltung'ana lemeata nakurrieki ta Mparri e Laitoriani lang Yeso Kristo.

⁹ Keisiligai Nkai naipotoka ntae nchula e nkerai enye Yeso Kristo, Laitoriani lang.

Oro taatua nchula ee ltung'ana ooiruko Kristo

¹⁰ Kaamon ntae lalachera o nkanachera ainien ta nkarna niyanyitnyit e Laitoriani lang Yeso Kristo, entining'oto pooki miatata oro taatua ntae, niakuku nabo katukul taa mparrunot o too nduaat.

¹¹ Amu, lalachera o nkanachera ainien, kaatiaakita ltung'ana le nkang e Kileo ketii nchankar atua ntae.

¹² Kore taa dei najoito, naa nchere keti lkulinchi oojo, <> nejo likae, <> nejo likae, <> neitoki ake likae ajo, <>

¹³ Amaa keoro Kristo? Paulo apa etechoki metanang'a ntae? Tana ta nkarna apa enye eipatisaki ntae payie iakuku lenyena?

¹⁴ Kaicho Nkai nache eitu aipatis lobo linchi mara ake Kirisipo o Gayo.

¹⁵ Naaku meatae lobo taa ntae ooidim atejo keipatisaki ta nkarna ai payie eaku lalai.

¹⁶ Ee kaipatisa sii apa Sitepanas o nkang enye, kore narepaa inia, maparru hoo ajo keatae likae tung'ani laipatisa.

¹⁷ Neitu dei apa aairriu nanu Kristo mayeu aipatis ltung'ana, kake kaairriwuayie matilikoi Lomon Supati namara te njartano e ltung'ani payie meaku pecheu etua Kristo to lmusalaba.

Kristo ngolon o ng'eno nagut e Nkai

¹⁸ Kore lomon ooipirita lmusalaba le Yeso naa madai too lolo ooidaaya, kake kore tee iyioo ooitejeuni naa ngolon e Nkai.

¹⁹ Ana sii nejo Lkigerot Sinyat nchere, <>

²⁰ Amaa, koree naa laing'eni? Oo laiteng'enak loo nkitanapat, tanaa larriyiak le ana kop ooyielo aatowolu mbaa? Meibala ajo, eitaa ꞉Nkai ng'eno e nkop madai?

²¹ Keirichakinete ltung'ana ng'eno enche, naaku eitu eyielou Nkai abaki etoduaa ng'eno enye. Neroyie Nkai achamaa aitejeu lolo ooiruk ninye aimu ana likoroto najo ltung'ana madai.

²² Amu kedede keing'oru Lyiaudi mbaa e nking'asia naaitodolu aajo Nkai eing'uaa inia nalikoritae, neing'oru Lgirriki ng'eno.

²³ Kake kore iyioo naa ikilikoo Kristo aajo ketechoki, naa ntaboi inia too Lyiaudi nera madai too lolo lamara loo Lyiaudi.

²⁴ Kake kore too lolo oipoto Nkai, peera loo Lyiaudi tanaa sii ltung'ana lamara loo Lyiaudi, naaku ninye ilo Aitejeunoni oanyutae nera sii ngolon o ng'eno e Nkai.

²⁵ Amu kore inia nalioo etuwuana madai e Nkai naa ng'eno nalang ng'eno e ltung'ani, naa kore inia nalioo etuawuana nchalan e Nkai naa ngolon nalang ngolon e ltung'ani.

²⁶ Entaparru ja lalachera o nkanachera ainien, nitiuu apa payie eipot ntae Nkai, lkuni taa ntae apa oaara ng'eni to nkung'urata ee ltung'ana, mara lkumo linchi oogol, namara sii kumo looing'uaa nkang'ite kutuaa.

²⁷ Kake etegelua ꞉Nkai ltung'ana oodol nkop etuwuana kemada payie eitukurru laing'eni, negelu loaachal payie eitukurru loogol.

²⁸ Etegelua ꞉Nkai ltung'ana lemeiken nkop aitaa toki o loomenari, payie eitodou aitaa meitoki inia nailiepie nkop.

²⁹ Ketaasa Nkai ana payie meatae ltung'ani ooidim aikarra tekue ninye.

³⁰ Tankaraki Nkai payie itii atua Laitejeunoni Yeso, neitaa ninye ng'eno aang. Amu kore te inia nataa Yeso, nikitum iyioo sotua oipida o Nkai, nikiaku ltung'ana lenyena sinyat oaatalakuaki,

³¹ payie ebaya najo Lkigerot sinyat, <>