ZEKARIA 9 - AMÜSA BAIBEL (BSI)

Kurümrü Yuchoti Yukhacho

¹ Hiba hi Abüdongba yusi: Hadrak lih ko Damaskas yangdi khingchinung yuzeng jüko. Israel hung du mah, ta Syria yangdiba zehnü Abüdongba yo.

² Hadrak lurü la liba Hamath tsü abi yo, hütsü roh-i axangchehrü zeh Tyre ko Sidon yangdi zeh.

³ Tyre-nü abükyü nengdang yangtbü tbüko ko abükyü nengdang hon ko taripi sehnyeh roh-i bhümpüle.

⁴ Ta Abüdongba-nü abükyü kangcho apüm hitsijünung. Abinü abükyü kuthsi kihdi la thohpehjünung, ko yangdi tsü alih rong trüpnung.

⁵ Ashkelon yangdinü hi ngu drünung. Gaza yangdinü hi ngu müci mükangkehnung. Hütsüta Ekron ko abükyü alongdi changpehnung. Gaza yangthsaba changpehnung, ko Ashkelon thrüchahchüpehnung.

⁶ Ayohrütacho yuchoti Ashdod la linung. Abüdongba-nü yore, “Hiri amüthseh Filistiarü Ihnü longlümsohnung.

⁷ Arühnü adelü ashühzeh shuh mütsunung, ko apa amamoh tsuyongnung mütsunung. Anyingcho atümung I nyitsarü kangnung ko Juda hung la tsutpu khüdu kangnung. Jebus-rü kyo Ekronrüsü I nyitsarü kangnung.

⁸ Ihnü I lih nyahnung ko hütsü khu arorüh mülahkhusohnung rothsarü yohpünung. Adelü akhingchirü khyang I nyitsarü müdhrümchisohnung. I nyitsarü khüta chongchacho Ihnü nguko.”

Aronung Yangthsaba

⁹ Künyangtaang, Zion-rü! Akünyangnü züdeing, nührü Jerusalemrü! Dhing, nührü yangthsaba nührü yang role! Abi akoh ngu rore, ta longlüm kang Gadu za khüdu chah pümpü rore.

¹⁰ Abüdongba-nü yore, “Israel lanü khode kuri akhüluba khyümüipehjünung, Jerusalem lanü kuri khyüjünung; rothsala bichiba sing thsaluti khyahnahjünung. Nührü yangthsabanü yuchotila yangtsa külüpnung; Abinü kihdi khüdu lanü khüdu chii, Eufrates yongkhi lanü alimih achangchi yangthsanung.”

Tsingrangba Nyitsarüti Külüpchijünung

¹¹ Abüdongba-nü yore, “Kangmübü shühnü shingti nührü te zengtachonü, Ihnü nührü nyüje kangsohnung yangtsila kungcheh licho shukuh lanü lehchehnung.

¹² Thalieng, adelü nührü alongdi lile; nührü khümcho lih lang thalieng. Ihnü ade nührü te yore, “Nührü chongchacho anyüshinü alaa amüwanung Ihnü nührü khyang thali jünung.

¹³ Ihnü singthsalu kyo Juda ko Israel tsü tbüdeng roh-i bichinung. Greek-rü nyüm chitanung, Zion tsü nohsheng roh-i Ihnü bichinung.”

¹⁴ Abüdongba-nü apu müyurü michah ngusohnung; Abinü tsingchi roh-i atbüdeng kyanung. Amichahba Abüdongba-nü rühti mehnung; Abinü kihjinglangnü tsingxinyübongla shemüsunung.

¹⁵ Akohbong Abüdongba-nü Abi müyurü khümnung, ko arühnü arorüh changjünung. Arühnü amücharü kyo rothsala züdenung ko arüh rorüh shüh threhnung; Kangmübü shüh bholu chah tungkehjücho kyo pohnung.

¹⁶ Hütsü nyümong rode, Abüdongba-nü Abi müyurü khümchonung. San nyahrünü asanti dhsürü lanü khümchocho kyo. Yangthsaba kuthri taripi kyo alih la hechinung.

¹⁷ Limih tsü khüta atsa ko atsah atsa thsanung! Tsang ko cikihnü dhrezarüti rezeh zinung.