ZEKARIA 7 - AMÜSA BAIBEL (BSI)

Laayü Kongcho Mülangjücho

¹ Darius yangthsapü kang müyüu, choo düku (Kislev choo) amüyüu nyümong, Abüdongba-nü I khyang yusi hi jücho.

² Bethelrünü Sharezer ko Rezemelek ko arüh nyitsarü Akohba Abüdongba Amübükuh lang amüwa chingnung

³ ko bebürü ko azikehrü te hi tsingdhingnung müthehcho: “Amübükuh thsangnyangcho nengdang, kang hitoi Ihsanü nguchi rocho roh-i, choo müngau tsü Ihsanü mütozah kongnung do?”

⁴ Ih yang roba Abüdongba yusi tsü hi.

⁵ Abinü yocho, “Arühnü kang nyühre choo amüngau ko dhünyeh-ula kongnü me traba tsü I jengrengjo nguchicho mah pü alih la müyurü ko bebürü te young.

⁶ Ko arühnü tsuba ko yongba tsü, arüh longnyüpnung nengdang du thsacho.”

⁷ Jerusalem rii jode ko arüh yangdi mükang lijengcho du mah, ta adesü kihjing lahpi ko nyüzüdu lang azong jingdümpi nyitsarünü jeng li bekhyah, Abüdongba-nü müngulang azikehrü khu yocho.

Yocho mühnyicho Khu Yangtsinung Kangcho

⁸ Abüdongba-nü Zekaria khyang yusi hi jücho:

⁹ “Akhudinü I nyitsarü khyang yuzeng hi jücho: ‘Yuje yu khaang, palu jünirü te amüi ko yanglilüm ngung.

¹⁰ Chomirü, mürürü, shirü mahkhang ailümrü tüsehchi; ko sünü lasiking la ajünirü nyüm rah tükülüp.’

¹¹ “Ta I müyurütinü mühnyinung hongzire. Arühnü arüh lasiking khangtire ko arüh lasiking lung roh-i müküpre.

¹² Tunüo papade Ihnü azikehrü khu müthehba adoba tsü arühnü mühnyire, Ih dee wahpehko.

¹³ Ihnü yode arühnü mühnyichonü, arühnü kihchide Ihnü mülalingcho.

¹⁴ Tsingxinyübong roh-i arüh limih palang linung Ihnü fopehcho. Hiba alih asu hi süsü mülipü naying pehjücho.”