ZEKARIA 6 - AMÜSA BAIBEL (BSI)

Kuri Akhüluba Müyü Müngucheh

¹ Ihnü müngucheh apa khüdu ngucho. Hiba bekhyah imüyeng zong anyüh kahlanü kuri akhüluba müyü chürochi Ihnü ngucho.

² Akhudiba kuri akhüluba tsü kuri amohti, anyüuba tsü kuri anyahtinü,

³ asanguba tsü kuri athrutinü ko müyüuba tsü kuri müdrimütrahtinü tphahcho.

⁴ Hütsüde Ihnü riwüba te tsingcho, “Adirü, hiri tu adüzüo?”

⁵ Abinü lalingcho, “Hiri hi nyübong müyü; Arüh limih apüm Abüdongba chahnü ade du rore.”

⁶ Kuri anyahtinü tphahba tsü kihku lang Babylon yang, kuri athru tsü nyüzüdulang, ko kuri müdrimütrahti tsü kihjing limih lang tsiyacho.

⁷ Müdrimütrah kuriti chürode, arühnü limih xodhingnung müwünung mürangcho. Riwürü tsünü yocho, “Wüng ko limih tsü xodhing” ko arühnü wücho.

⁸ Hütsüde riwüba tsünü Ite züde yocho, “Kihku lang Babylon lang wüba kuritinü Abüdongba rihlong chüroba kihchoko.”

Joshua Khyang Kuthri Thrijünung Mülacho

⁹ Abüdongba-nü I khyang yusi hi jücho.

¹⁰ Abinü yocho, “Arangtsirü Heldai, Tobija ko Jedaia chahnü jiyüti khyüng ko Zefania tsurü Joshua kulang zah wüng: Hiri nyitsarü atümung Babylon la yangtsi lanü thaliko.

¹¹ Arühnü jüba hon ko taripi tsünü kuthri külüpm, ko hütsü Jehozadak tsurü Joshua Bebü amungthriba thah la thrijüng.

¹² Akohbong Abüdongba-nü yorepü abi te young, ‘Nyitsarünü süte Ajengza dsiro abi lichola abinü müwajünung ko Abüdongba amübükuh thali thsanung.

¹³ Hütsü abinü thsanung ko yangthsaba jengreng abinü ngunung, ko abinü apu müyurü michah thsanung. Bebürü khüdu abi yangthsaba pümji müshüm yanung, ko arühnü atbachi ko akehtala müjang nguchinung.’

¹⁴ Heldai, Tobija Jedaia ko Josiah nengla yangthsaba kuthri tsü Abüdongba Amübükuh la amünbüchünung yohpünung.”

¹⁵ Ashula lirütinü ro Abüdongba kuh thsachila tronung. Ko khode hi thali thsanang, Akohbong Abüdongba-nü nührü yang Ih müthehchoepü nührünü müdhenung. Nührünü Abüdongba nührü Tsingrang yuzeng ajeng nyikhang hiri apüm tikehnung.