ZEKARIA 5 - AMÜSA BAIBEL (BSI)

Mülachiba Thrahlohcho Münguchehcho

¹ Ihnü thali dhingcho, ko hiba bekhyah thrahlohcho khüdu nyübongla mülachi ngucho.

² Ihnü tu ngucho pü ninglang riwürünü Ite tsingdhingcho. Ihnü lalingcho, “Thrahlohcho khüdu nyübongla mülachi yale; Hütsü athsenglang khehap mükyü, ko adilang khehap dhüre lile.”

³ Hütsüpü abinü Ite yocho, “Hütsüla limih apümlang chokehcholanung thrah lile. Atpah khüulang limih lanü aführü apüm pehnung thrah licho yore; atpah khüulang arahkheh cho yuchümrü apüm khyümüi pehnung thrah licho yore.

⁴ Hiba chokehchola hi aführü kukhi müipi, ko arahkheh cho yuchümrü kukhi müipi la züdunungepü Akohbong Abüdongba-nü yore. Arüh kukhitila hi linung ko arüh thsangnyangjünung.”

Loh la Khingkurü Münguchecho

⁵ Ninglang riwürü thali chüropü yocho, “Dhing! Langpa khüdu role!”

⁶ Ihnü yocho, “Hütsü tuo?” Abinü lalingcho, “Hi limih apüm münyi nengdang yoba loh khüdu lile.”

⁷ Loh tsü akhangtising ilünü külüpcho. Ihnü dhingde, akhangtising tsü luthrucho, ko loh la tsü khingkurü khüdu pümcho!

⁸ Ninglang riwürü tsünü yocho, “Hiba khingkurü adüzü athrünyi.” Hütsüpü abükyü tsü loh la dümyohchüpü hapticho.

⁹ Ihnü tsungmüsu dhingde, khingkurü anyüh kih uza adsaya kyo Ih yang mong rocho. Arühnü loh tsü khyo bipü mongtsicho.

¹⁰ Ihnü riwürü te tsingdhingcho, “Hütsü khüde hitsiro?”

¹¹ Abinü lalingcho, “Arühnü hütsü nengdang amübükuh thsanung Babylon lang hiwüre. Amübükuh tsü thümpü, mübünung nengdang loh tsü hütsüla yohpünung.”