ZEKARIA 4 - AMÜSA BAIBEL (BSI)

Dsimüdongsing Müngucheh

¹ Ite chota yaba ninglang riwüba tsü thali rocho ko Ih yüpseh licho kyo khamüsucho.

² Abinü yocho, “Nühnü tu nguro?” Ihnü lalingcho, “Hon-nü külüpcho dsimüdongsing khüdu.” “Akuchah tsü tuji yohnung tbhüza khüdu kehcho. Dsimüdongsing chah tsü dsi dhünyeh ko hütsü müipila pita zehcho.

³ Dsimüdongsing müshüm olive singdong anyüh khüulang khüdu khüulang khüdu licho.”

⁴ Achotsü Ihnü riwüba te tsingcho, “Adirü, hiri hi tu adüzüo?”

⁵ Abinü Ite tsingdhingcho, “Nühnü mümüdherü do?” Ihnü lalingcho, “Adirü, Ihnü mümüdhe.” (Arü 10b— 14, Yukheh chungkehtasohnung hirocho lile)

Zerubabel te Nyengchocho

⁶ Abüdongba chahnü yu hi Zerubabel te yonung ninglang riwürünü Ite yocho: “Kohdichonü mah, mahkhang mübü tasenü mah, ta I nbü khu kohsohnung.

⁷ Nü bete azong toh-i athsungkyang linye changpehnung. Nühnü amübükuh tsü thsachinung, ko nühnü lung achangkathsa müdongde, ‘Tsarale, Tsarale pü müyurünü züdenung!’”

⁸ Abüdongba chahnü apa yusi khüdu Ih yang rocho.

⁹ Abinü yocho, “Zerubabel-nü amübü kuphi tsü khengko, ko abinü thsakanung. Hi tikehde, Abüdongba-nü Ih arüh yang müthehchoepü arühnü müdhenung.

^10a Azikehba tsü khairachonü arüh mükünyangcho. Ta Zerubabel-nü münyehli amübükuh thsacho arühnü ngunung ko arüh künyangnung.”

^10b Ninglang riwürünü Ite yocho, “Dsi dhünyeh tsü limih apüm nguba Abüdongba nahtse dhünyeh lile.”

¹¹ Hütsüpü Ihnü abi te tsingdhingcho, “Dsimüdongsing anyüdinglang olive singdong anyüh adüzü tuo?

¹² Ko olive tuji tungkehba hon müsü anyüh müshüm olive jengza anyüh adüzü tuo?”

¹³ Abinü Ite tsingcho, “Nühnü mümüdherü do?” Ihnü lalingcho, “Adirü, Ihnü mümüdhe.”

¹⁴ Hütsüpü abinü yocho, “Hiri nyitsarü anyüh hi limih apüm Abüdongba Tsingrang-nü Abi dikehnung müyühjü throchehcho lile.”