ZEKARIA 3 - AMÜSA BAIBEL (BSI)

Amungthriba Bebüba Nengdang Müngucheh

¹ Müngucheh apa khüdula Amungthriba bebüba Joshua Abüdongba riwürü bete ya ngucho. Ko Joshua müshüm satan, abi mülangjünung rungnümpü yacho.

² Abüdongba riwüba tsünü satan te yocho, “Abüdongba-nü nüh mülangjüng, satan! Jerusalem müiba, Abüdongba-nü nüh mülangjüng. Hiba nyitsarü hi michangnah kyole.”

³ Joshua hütsüla münyicho jengki khyüpü yacho.

⁴ Ninglang riwüba tsünü ninglanglarü te yocho, “Hiba nyitsarü chahnü münyicho jengki tsü hitsieng.” Hütsüpü abinü Joshua te yocho, “Ihnü nü münyiti hitsiko ko jengki asi jünung.”

⁵ Abinü Joshua chah thahyüh amüsa yühjünung ninglanglarü te mülajücho. Arühnü hütsüta nguchicho ko Abüdongba ninglang riwürü hütsüla yade arühnü abi khyang jengki asi khyüsohcho.

⁶ Hütsüde ninglang riwürünü Joshua te Akohba Abüdongba-nü yocho abinü yocho:

⁷ “Nühnü I yuzeng nyi Ihnü nü khyang mülacho nguchikhang, nühnü I amübükuh ko hütsüla khehthsi thsanung. Ko I yola liba riwürütinü kihchide nyicho roh-i Ihnü nü kihchicho nyinung.

⁸ Hütsüeko nyieng, Joshua, nüh Bebü Amungthriba; ko abi te müjang bebürüti nyieng, nührü aronung suro atsa: Ajengza dsiba I dikehrü mishajünung!

⁹ Dhing, Ihnü Joshua bete lung khüdu chah kung dhünyeh kehba yohpüre. Ihnü hütsü chah ayah ham tühkehnung, ko nyümong khüdunü hiba yucho münyiti Ihnü khyümüipehjünung.

¹⁰ Hütsü ro chih nyümong, nührü shükusih ko ngurüsih luhnü mükangtipü nührü müipinü abürü kurümrü dsiyoh akünyang ko atbachi changtanung.”