ZEKARIA 2 - AMÜSA BAIBEL (BSI)

Akihsing Müngucheh

¹ Ihnü nyüh khüdu akheh la akihsing bipü müngucheh khüdu ngucho.

² Ihnü tsingcho, “Nüh khüde würo?” Abinü lalingcho, “Jerusalem kidhingnung, athsenglang ko adilang khütoinang dhingnung.”

³ Hütsüde Ite chota yaba ninglang riwüba tsü shehkhucho, ko apa riwürü khüdu abi shirünung rocho.

⁴ Akhuba tsünü akhüu te yocho, “Jerusalem la nyitsarü ko kanglungrü drongranunge ko arüh mütbütilongnungepü shangwü akihsing biba dhrezaba te tsü young.

⁵ Yangdi khümchonung apu tsü michang tbü kangnung ko hütsüla abi ahechi apüm linungepü Abüdongba-nü yore.”

Yangtsirü Thalinung Dsicho

⁶ Abüdongba-nü müyurü te yocho, “Ihnü apümlang nührü tsishosohcho.

⁷ Ta ade, nührü yangtsirü, Babylon lanü tsichehng ko Jerusalem lang thalieng.

⁸ Khürünü nührü chah khehthakhang Iyo thsidi chah thahpüre.” Hütsüeko Akohbong Abüdongba-nü Abi müyurü kengchorü yuchoti yang hiba yusi te Ih müthehcho:

⁹ “Abüdongba apunü nührü nyüm yanung ko, khüdupi nührü yurü thsaba nyitsarünü nührü kengcho khyünung.” Hi tikehde, Akohbong Abüdongba-nü Ih müthehchoepü atümungnü müdhenung.

¹⁰ Abüdongba-nü yocho, “Jerusalemrü, akünyangnü khi thsaang! Ih nührü yola linung rore!”

¹¹ Hütsüde yucho adrong Abüdongba yang ronung ko Abi nyitsarü kangnung. Abi nührü yola linung, ko Abinü Ih nührü yang müthehchoepü nührünü müdhenung.

¹² Thali Juda tsü Abi Amüsa lih la Abüdongba yo atsauba kangnung, ko Jerusalem tsü apüm yola abinü müiba yangdi kangnung.

¹³ Atümungnü Abüdongba bete sahmüthsa lieng, tunüo Abi Amüsa alichahnü rore.