ZEKARIA 10 - AMÜSA BAIBEL (BSI)

Nüchehnung Nyengchocho

¹ Abüdongba te chisikyang tsing müthehngpü kihchieng. Atümung nengdang tsahmarü thümlangsohnung tsing ko nyükhi müthehba tsü Abüdongba.

² Nyitsarütinü kyothri ko amongrü te müchehmülohre, ta arahkheh ko amükhyu du arühnü ngure. Khürünü melang adüzü yorü, ta nüh du nümülare; arühnü alongdi jüba tsü amii mühle. Hütsünü nyitsarüti achahcho San kyo rümchire. Arüh langnürü mülichonü chongchare.

³ Abüdongba-nü yore, “I nyitsarü michah thsarü yangpirü te Ih wahre, ko Ihnü arüh khingchinung. Judarü tsü Iyo, ko Ih, Akohbong Abüdongba-nü arüh xükümnung. Arüh tsü re azeh I rothsa kuri kangnung.

⁴ Arüh yolanü I müyurü michah yangthsanung yangthsarü, langnürü ko anüchirüti chüronung.

⁵ Rothsarünü yanglong chongbongla arüh rorüh dhrümchicho kyo Judarünü akoh ngunung. Abüdongba arüh te zehchonü, arühnü arüh rorüh kuri chah pümrüti miinü koh chitanung.

⁶ “Ihnü Judarü rezehsohnung; Ihnü Israelrü khümchonung. Ihnü arüh te chomangnung ko arüh atümung kulang nüli ronung. Arüh tsü Ihnü khodesü thrüchahchü müpehcho roh-i kangnung. Ih, Abüdongba arüh Tsingrang; Ihnü arüh kihchicho lalingnung.

⁷ Israelrü tsü rothsarü kyo thrungnung, Yongkha yongrü kyo künyangnung. Hiba akoh hi arüh tsurü shümtsurünü lümkehnung ko Abüdongba-nü tu nguchicho hütsü nengdang künyangnung.

⁸ “Ihnü I nyitsarü dsinung ko arüh müjang nübülungnung. Ihnü arüh khümchonung ko papade roh-i arüh mükhilong kangsohnung.

⁹ Ihnü arüh tsishosohnye, ashulanüsü arühnü Ih lümchehnung. Arüh ko arüh tsurünirüti khümchonung ko müjang kuh yang thali ronung.

¹⁰ Ijip ko Assyria lanü Ihnü arüh kuh yang noronung ko arüh palu lih la lisohnung. Ihnü Gilead ko Lebanon lasü lisohnung; Alimih apüm nyitsarünü jengsohnung.

¹¹ Arühnü achongcha kihdi kehde, Ih, Abüdongba-nü kihloh tsü xüpnung, ko Nile asoh-uba tsü kungpehnung. Amüthseh Assyria longlüm kangnung, ko akohba Ijip tase changpehnung.

¹² Ihnü I müyurü rezehsohnung; arühnü Ih mübünung ko yochonyinung.” Abüdongba-nü choko.