ZEKARIA 1 - AMÜSA BAIBEL (BSI)

Abüdongba -nü Apu Müyurü Ximülanung Dsicho

¹ Persia la Darius yangthsapü kang anyüh choo keh-ula, azikehrü Zekaria, Iddo shümtsurü, ko Berekia tsurü yangnü Abüdongba-nü hiba yu jücho.

² Akohba Abüdongba-nü Zekaria khu müyurü te hita yocho, “Ih Abüdongba-nü, nührü jümürü te zichürocho,

³ ta Ihnü ade nührü te yore, ‘Ih yang ximülaang, ko Ih nüh yang ximülanung.

⁴ Nührü jümürü tükyo. Adelü amünyi akang ko amünyi la mülinung papadenü azikehrünü I yusi arüh te yoko. Ta arühnü Iyu mücijo mühnyire mahkhang yocho mühnyire.

⁵ Nührü jümürüti ko hütsüri azikehrüti adelü akang mühle.

⁶ I dikehrü azikehrüti khu Ihnü nührü jümürü khyang yuzeng ko amüzahnung jücho, ta arühnü hütsü mükhyücho, ko hütsü ngang arüh chongchako. Hütsüpü du Ih Akohbong Abüdongba-nü lümcho roh-i, arüh aleng Ihnü arüh khingchichoepü lasih thsamüla Ih müdhecho.’”

Kuri nengdang Müngucheh

⁷ Darius yangthsapü kang anyüh choo dhürekheh-u (Shebat choo), nyümong mükyüpü müyüula, Tsingrangba-nü aromang müngucheh khüdu I khyang jücho.

⁸ Abüdongba riwürü khüdu kuri amoh chah püm Ihnü ngucho. Abi khanglang aparü kuriti amoh, amüdri ko myrtle singdong athru yaba ngah khüdula Ih yalisohcho.

⁹ Ihnü abi te tsingcho, “Adirü, hiri kuriti adüzü tuo?” Abinü lalingcho, “Arüh tunang Ihnü nüte ngunung.

¹⁰ Abüdongba-nü alimih tsü xodhingnung arüh müthehcho.”

¹¹ Arühnü ninglang riwürü te yocho: “Ihrünü limih apümlang wüko ko limih apüm alongdi müli ko achangba surola li nguko.”

¹² Hütsüde riwüba tsünü yocho, “Akohbong Abüdongba, Jerusalem ko Juda la yangditi te kang nyühre zichüro rore. Adesü khütoi nyahli arüh te zichüro linung?”

¹³ Abüdongba-nü ninglang riwürüti kihcho yocho,

¹⁴ ko Akohbong Abüdongba-nü tu yocho hütsü sobhonung Ite riwüba tsünü yocho: “I Amüsa yangdi Jerusalem nengdang Ihnü dee soh müi lümre,

¹⁵ ko naying, yangtsa la künyangta liba yuchoti te Ih khütang wahre. Tunüo Ihnü I nyitsarü te rangcho lide, hiri yuchotinü I nyitsarü amütsauba chongchasohre.

¹⁶ Hütsünü yangdi te achomang ngunung Ih thali rocho. I amübü kuh thali khyünung, ko I yangdi külüpchinung.”

¹⁷ Adesü riwübanü Ite sobhonung yocho: “Abi yangditi thali müwajünung ko adesü Jerusalem tronü yangdi tsü apu yo kanglinungepü, Akohbong Abüdongba-nü yore.”

Shujüh Müngucheh

¹⁸ Adesü misü jüh müyü müngucheh ngucho.

¹⁹ “Hiri shujüh adüzü tuo” pü Ite chotayaba ninglang riwürü te Ihnü tsingdhingcho. Abinü lalingcho, “Arüh tsü Juda, Israel ko Jerusalem nyitsarüti tsishosohba alimih tase nengdang yore.”

²⁰ Hütsüpü Abüdongba-nü ikengrü müyü ahamsing bipü Ite ngusohcho.

²¹ Ihnü tsingdhingcho, “Hiri tu nguchinung rocho?” Abinü lalingcho, “Juda limih sehchi changjü anyitsarüti shupishuzajüba yuchoti drüsohnung ko changjünung rocho.”